ABŞ-dan Rusiyaya G-20 ZƏRBƏSİ: “Ruslar varsa, biz yoxuq”
ABŞ Rusiyanın iştirak etdiyi G20 toplantılarına qatılmayacaq.
Sfera.az bildirir ki, bu barədə ABŞ-ın maliyyə naziri Canet Yellen Nümayəndələr Palatasının Maliyyə Xidmətləri Komitəsində çıxışı zamanı məlumat verib.
O, bu qərarını G20 həmkarlarına açıq şəkildə ifadə etdiyini bildirib:
"Prezident Bayden bildirdi ki, Rusiya üçün heç bir maliyyə qurumunda işlər həmişəki kimi ola bilməz və mən onunla tamamilə razıyam. O, Rusiyanın G20-dən çıxmasını istəyirdi. Mən də İndoneziyadakı həmkarlarıma rusların orada olacağı təqdirdə, bir sıra görüşlərdə ABŞ-ın iştirak etməyəcəyini açıq şəkildə dedim”.
Xatırladaq ki, Bayden keçən ay Belçikanın paytaxtı Brüsseldə keçirdiyi mətbuat konfransında Rusiyanın G20-dən çıxarılmasının lazım olduğunu bildirsə də, bu addımı rəsmiləşdirmək üçün digər üzvlər arasında razılaşmanın lazım olduğunu vurğulamışdı. Növbəti G20 Liderlər Zirvəsi noyabr ayında İndoneziyada keçiriləcək.
Günay Rəsulqızı
Sfera.az
