Almaniyada müharibə panikası - Qida qıtlığı yarana bilər
Media
17:10 / 01.04.2022
1001
Almaniyada Ukrayna-Rusiya müharibəsi ilə əlaqədar yağ və un kimi qidaların qiymətində artım qeydə alınıb.
Sfera.az bildirir ki, Almaniya Federal Statistika İdarəsi ilin 8-ci həftəsindən 10-cu həftəsinə qədər istehlakçıların cari alış davranışı ilə bağlı statistik məlumatları dərc edib. Müvafiq olaraq, müharibə həftəsində bölgədəki alman istehlakçıların yağ və un kimi qidaları getdikcə daha çox yığmağa başladıqları ortaya çıxıb.
7-13 mart tarixlərində ölkədə yağın satış rəqəmləri 6 ay əvvəl 2021-ci ilin orta göstəricisi ilə müqayisədə 123 faiz, un satışı isə 206 faiz artıb.
"Artım müharibənin başlaması ilə əlaqələndirilə bilər, çünki satışlarda bu cür artımlar son 6 ayda baş verməyib”, - idarə açıqlamasında qeyd edib.
İlin 11-ci həftəsində (14-20 mart) un və yağın satış rəqəmləri əvvəlki həftə ilə müqayisədə azalsa da, yüksək olaraq qalıb.
Almaniyada pandemiyanın başlanğıcında makaron, un, tualet kağızı, dezinfeksiyaedici məhlul və sabun kimi məhsullara tələbat artmışdı. Sözügedən dövrdə bu malların satış həcmindəki dalğalanmalar təxminən 10 həftə davam edib.
Xatırladaq ki, Ukrayna ilə Rusiya günəbaxan yağı və buğdanın ən böyük istehsalçıları sırasındadır. Rusiya Kənd Təsərrüfatı Nazirliyi daxili bazarda sabitliyi qorumaq üçün aprelin 15-dən etibarən günəbaxan yağı ixracına müvəqqəti olaraq kvota qoyub.
Günay Rəsulqızı
Sfera.az
