Türkiyənin xarici ticarət kəsiri fevralda bir qədər də böyüyüb.

Sfera.az Türkiyə Statistika Təşkilatına (TÜİK) istinadən xəbər verir ki, fevralda kəsirin məbləği ötən ilin eyni ayına nisbətən 35,5 faiz artıb. Ötən ilin fevralında 5,8 milyard dollar olan kəsir bu ilin fevralında 7,88 milyard dollar təşkil edib.

İki aylıq xarici ticarət kəsiri isə 83,3 faiz artaraq 18,2 milyard dollar olub.

Kəsirin böyüməsi idxalın daha çox artması ilə bağlıdır. 2022-ci ilin fevralında ixrac əvvəlki ilin eyni ayına görə 25,4 faiz artaraq 20 milyard 4 milyon dollar olduğu halda, idxal 44,5 faiz artaraq 27 milyard 885 milyon dollar təşkil edib.

Türkiyənin xarici ticarət kəsirinin böyüməsində xam neftin və təbii qazın, həmçinin qızılın bahalaşmasının böyük rolu var.

Enerji və qızıl nəzərə alınmasa xarici ticarət kəsiri 560 milyon dollar olub.

Qeyd edək ki, xarici ticarətdə kəsirin böyüməsi ölkənin tədiyə balansında da kəsirin məbləğini artıracaq. Bu səbəbdən 2022-ci ildə lirənin ucuzlaşmasının davam edəcəyi ehtimalı böyükdür.

Vasif

Sfera.az

Türkiyənin xarici ticarət kəsiri böyüyüb – Lirə bir qədər də ucuzlaşacaq