COVİD-19 bitməmiş YENİ TƏHLÜKƏ: Ebolaya bənzər ölümcül virus yayılır

Sfera.az bildirir ki, ölkədə Ebolaya bənzər virusa yoluxma halına rast gəlindiyi bildirilib. İngiltərə Sağlamlıq Təhlükəsizliyi Təşkilatının verdiyi açıqlamaya görə, virus Orta Asiyadan İngiltərəyə səyahət edən qadında aşkarlanıb. Səlahiyyətlilər, hadisənin hələlik kütlə sağlamlığı üçün risk törətmədiyini, lakin diqqətli olmaq lazım olduğunu söyləyiblər.

 

Məlumata görə, "Krım-Konqo hemorragik qızdırması” adlanan xəstəlik iribuynuzlu mal-qara üzərində yaşayan gənə dişləməsi ilə ötürülür. Çox təhlükəli və ölümcül virus olan CCHF virusu Ebola ilə müqayisə edilib.

Sözügedən virusun pandemiyaya səbəb olmadığı, lakin dünyanın bir çox yerində endemik var olduğu qeyd olunub. Bu yerlərin başında Afrika, Balkanlar, Yaxın Şərq və Asiya ölkələri gəlir.

 

Virus daşıdığı aşkarlanan qadına Kembric Universiteti xəstəxanasında diaqnoz qoyulduğu açıqlanıb və onun hazırda Londondakı xəstəxanalardan birində müalicə olunduğu bildirilib. Viroloq Susan Hopkins "Epidemiya haqqında danışmaq çətindir, çünki bu xəstəliyin insandan insana keçmə riski azdır. Ancaq hər kəs xəstəliyin endemik olduğu ölkələrdən keçdiyini və hansı təhlükələr yaratdığını bilməlidir”, - deyə söyləyib. 

Xəstəliyin "Hyalomma” adlı gənə növündən keçdiyi diqqətə çatdırılıb və bu növün Asiya, Avropa və Şimali Afrikada görüldüyü açıqlanıb. Yay aylarında artan bu gənələr tərəfindən dişlənilən insan dərhal müalicə olunmazsa, 3 gün ərzində ölüm baş verir. Xəstəliyin simptomları Ebolaya çox oxşardır - bunlara qəfil şiddətli baş ağrısı, yüksək hərarət, oynaq ağrıları, qarın ağrısı və şiddətli qusma daxildir. Ağır hallarda bu simptomlar davranış dəyişiklikləri və qavrayış pozğunluğu ilə müşayiət olunur. Digər tərəfdən, mütəxəssislər hər kəsi çox diqqətli olmağa çağırır, çünki bu xəstəliyin simptomları COVİD-19-un simptomları ilə qarışdırıla bilər.