Putin Sergey Şoyqunu işdən çıxarıb? - 12 gündən sonra üzə çıxan nazirin şübhə doğuran GÖRÜNTÜLƏRİ

Sfera.az bildirir ki, Qərb mediası Şoyqunun köhnə kadrlarından istifadə edildiyini iddia edib. Belə ki, Vladimir Putinin Rusiyanın hərbi planlarının ABŞ və Böyük Britaniya kəşfiyyatına sızması, rus qoşunlarının meydanda yaşadığı uğursuzluqlar səbəbindən əsəbiləşdiyinə görə, bəzi generalları işdən çıxarması, bəzilərini həbsə atması uzun müddətdir müzakirə obyektinə çevrilib. Bütün bu prosesdə ən çox danışılan adlardan biri də Rusiyanın müdafiə naziri Sergey Şoyqu olub. Ekranlarda tez-tez görünən nazirin yoxa çıxması spekulyasiyalara səbəb olsa da, bir çoxları Ukraynadakı uğursuzluğa görə onun Putin tərəfindən işdən çıxarıldığını, bir qism isə, xəstə olduğunu iddia edib.

Putinin bir müddət Şoyqunu sızdırılan hərbi planlar və çevriliş şayiələrinə görə saxladığı deyilib. Məhz bu məqamda Şoyqunun 31 yaşlı qızı Kseniya internetdə yayımlanan fotoda Ukraynanın mavi və sarı rəngləri ilə pozalar verib. Həm dünya mediası, həm də Rusiya mətbuatı nazir qızının bu hərəkətinin Putinlə Şoyqu arasında gərginliyi daha da artırdığını yazıb. 

Bütün bu fərziyyələrdən sonra Şoyqu Putinin təşkil etdiyi Təhlükəsizlik Şurasının iclasına qatılıb. Əvvəlki görüşlərin hamısı Rusiya mətbuatında hərtərəfli işıqlandırılsa da, dünənki görüşün yalnız bir hissəsi yayımlanıb. Yayılan videoda ekranda bütün digər rəsmilər aydın göründüyü halda, Şoyqunun görüntüləri şübhə doğurub. Videoda rusiyalı nazir görünməzdən əvvəl ekran qısa müddətə qaralır və şəkil bir neçə saniyə silkələnir. Kremlin paylaşdığı videoda səsin olmaması və Şoyqunun şübhəli görüntülərinin yer alması videoda köhnə kadrlardan istifadə edildiyi iddialarına səbəb olub. Nəticədə Qərb mediası Kremli köhnə görüntülərindən istifadə edərək ictimaiyyəti aldatmaqda ittiham edib.