Azərbaycana "kirayə ordusu" gəlib: ev qıtlığı yaranacaq - Qiymətlər isə...

 

Maraqlıdır, vətəndaşların ölkəyə axını kirayə mənzil bazarına necə təsir edəcək?

Mövzu ilə bağlı Sfera.az-a danışan əmlak məsələləri üzrə ekspert Elnur Fərzəliyev deyib ki, Ukraynadan Azərbaycana gələn şəxslər, xüsusən də Bakı şəhərində kirayə mənzil bazarında qiymətlərə və mənzil qıtlığına səbəb ola bilər:

"Amma bu, kütləvi olmayacaq. Çünki buradan işə görə gedən həmyerlilərimizin demək olar ki, böyük əksəriyyətinin müxtəlif bölgələrdə, şəhərlərdə öz evləri var. Təbii ki, gələnlər öz evlərinə yerləşəcəklər. İmkanlı şəxslər Rusiya-Ukrayna müharibəsindən öncə oradan çıxıblar. Amma təəssüflər olsun ki, bu vəziyyətdə evakuasiya olunanlar məcburi köçkün kimi hər bir şeylərini itirmiş halda gəlirlər. İstər maddi və ya digər cəhətlərdən artıq sıxıntılar var. Bu baxımdan, kirayə evlərə tələbat artsa da, bu, bahalı evlərə elə də təsir etməyəcək”.

Müsahibimiz bildirib ki, gələn soydaşlarımızın bir hissəsi tələbələr, digər hissəsi ailə və iş dalınca gedən kişilər idi:

"Onların da əksəriyyəti öz evlərinə qayıdırlar. Ümumiyyətlə, hazırda Ukraynadan gələnlər arasında əmlak alışı ilə bağlı müraciət yoxdur, varsa da, yəqin, kənar yerlərdən maraqlanırlar. Ev alışı ilə bağlı maraqlanan olmasa da, bu, kirayə mənzil bazarına təsirsiz ötüşməyəcək. Digər tərəfdən, müharibə nəticəsində orda yaşayan, evləri olanların da böyük əksəriyyəti zərər görüblər.  Ukraynadan növbəti şəxslərin gəlişinin bazara təsirini isə zaman göstərəcək. Çünki ordan çıxan insanların (vətəndaşlığı olan) çoxu Avropaya üz tuturlar. Azərbaycana dönən vətəndaşlarımız isə hansısa formada ucuz kirayə evlərində qıtlığın yaranmasına səbəb olacaq. Bu istiqamətdə qiymət artımı da gözləniləndir”.