\"Rusiyada klanlar arasında mübarizə gedir\" - Putini devirmək planları...

 

Bununla bağlı Sfera.az-a açıqlama verən politoloq Teymur Qasımlı deyib ki,  Vladimir Putin bu günə qədər klanlar arasında balanslı siyasət aparırdı, uğurlu siyasi gedişlər edirdi:

"Ancaq Ukraynanın işğalı başlamamışdan qabaq da klanlar arasında problem yaranmışdı. Təhlükəsizlik Şurasında Rusiya Dövlət Dumasının sədri Sergey Narışkinin "Ukraynaya bir dəfə şans verək, daha sonra müharibə edək” deməsi bir daha göstərdi ki, çatlaq var. Bu da əsasən Sergey Şoyqu, yəni "ordu klanı”na qarşı idi. Artıq bütün bu müharibənin bədəli Şoyquya, onun klanına kəsilir. Bütün məlumatları ordu, hərbi kəşfiyyat verib - 8 generalın ordudan həbs oluduğu iddiası var, 2 FTX  generalı ev dustağı olunub. Ona görə də hazırda klanlar arası döyüş gedir. Gec-tez bunun hesabı ya Şoyquya kəsiləcək, ya da digərlərinə”.

Müsahibimiz bildirib ki, Vladimir Putinin siyasi karyerası bitib və bundan sonra o, namizədliyini verməyəcək:

"Ola bilsin, bu iki klan arasından ya Şoyqu, ya da FTX (Federal Təhlükəsizlik Xidməti) Putini devirsin. Ancaq Putin həm də yaxşı qorunur, heç kimi qəbul etməməsi, heç kimə qulaq asmaması, öz bildiyini etməsi istiqamətində iddialar var – yəni əmrləri qəbulsuz verir. Bu baxımdan Rusiya prezidentini ya devirə bilərlər, ya da Ukraynada məğlub olacaqsa, bu Vladimirin məcbur olaraq istefaya getməsinə yaxud sağlamlığını bəhanə edərək hakimiyyətdən imtinasına səbəb olacaq. Qaldı ki, rus xalqının Putini devirib-devirməməsinə, demək olar ki, xalq küçələrə az çıxır. "Ümumiyyətlə, rus xalqı demokratiya istəyirmi?” - bu ayrıca mövzudur. Düşünmürəm ki, xalq tam olaraq çıxıb Putinin istefasını tələb edəcək. Yalnız və yalnız klan onu endirə və bu mübarizə nəticəsində ola bilər. Digər tərəfdən, pərdəarxasında Bayden administrasiyası  da Putinin hakimiyyətdən getməsini istəyir”.