Putin ən təhlükəli bioloji silahları burada hazırlatdırır - Dünyadan təcrid olunmuş "Vektor"dan GÖRÜNTÜLƏR

 

Sfera.az bildirir ki, sözügedən hadisə Rusiyanın ən ciddi mühafizə olunan bölgələrindən birində yerləşən, "Vektor” kimi tanınan Dövlət Virusologiya Araşdırma Mərkəzini yenidən gündəmə gətirib. ABŞ-ın iddialarına əsasən, Putin bu müəssisədə istehsal olunan bioloji silahlardan Ukrayna hökumətini devirmək üçün istifadə edə bilər. Rusiya isə bu qurğudan yalnız vaksin tədqiqatları üçün istifadə olunduğunu irəli sürüb.

 

Məlumat üçün qeyd edək ki, Rusiya prezidenti Vladimir Putinin bioloji silah arsenalını Sovet dövründən qalma Sibirdəki obyektdə saxladığı güman edilir. "Vektor İnstitutu” da adlandırılan Dövlət Virusologiya Araşdırma Mərkəzində Rusiyanın Soyuq Müharibə dövründə başlatdığı bioloji silah planını davam etdirə biləcəyi ehtimal olunur. 

1974-cü ildə - soyuq müharibənin qızğın çağında bioterrorizm tədqiqat mərkəzi kimi açılan bu obyekt hələ də Rusiyanın ən ciddi mühafizə olunan ərazilərindən biridir. 70 min kvadratmetrlik mərkəz silahlı əsgərlər və tikanlı məftillərlə əhatə olunub. Dünyadakı maksimum təhlükəsizliyə malik 59 bioloji laboratoriyadan biri olan "Vektor”, koronavirus pandemiyasının mənbəyi hesab olunan Çindəki Vuhan Virusologiya İnstitutu ilə eyni statusa malikdir. Qazaxıstanla sərhəddə, cənub-qərb Sibirin kənarında yerləşən dördüncü səviyyəli məxfi obyekt, dünyanın ən sərt və ən təcrid olunmuş yerlərindən biri kimi tanınır. Burada qışda temperatur -35 dərəyə düşə bilir.

Rusiya iddia edir ki, SSRİ-nin bioloji silah istehsalı ilə məşğul olan onlarla laboratoriyasından biri olan "Vektor" Sovet İttifaqının dağılmasından sonra 1992-ci ildə silahlar üzərində tədqiqatları dayandırıb. Rusiyaya görə, müəssisə indi yalnız ölümcül viruslara qarşı vaksinlərin hazırlanmasına diqqət yetirir. Lakin ABŞ Dövlət Departamentinin keçən ilki hesabatında Rusiyanın bu cür tədqiqatları dayandırdığını israr etməsinə baxmayaraq, "aqressiv bioloji silah proqramını davam etdirdiyi” bildirilib.

 

Qeyd edək ki, laboratoriya 2019-cu ildə qaz partlayışı xəbəri ilə gündəm olub - içəridə işləyən fəhlə dərin yanıq xəsarətləri alıb. Eyni zamanda 15 il əvvəl laboratoriya işçisi Antonina Presnyakova ehtiyatsızlıqdan tərkibində "Ebola” virusu olan iynəni özünə vuraraq ölüb.  

"Vektor” həm də dünyada ölümcül çiçək virusununun olduğu iki laboratoriyadan biridir. Beynəlxalq müqavilə əsasında, virusun saxlanmasına icazə verilən başqa bir obyekt ABŞ Xəstəliklərə Nəzarət və Mühafizə Mərkəzidir.

"Vektor"dakı elm adamları daha əvvəl "Marburq” virusu üzərində çalışıblar və bu virus yoluxduğu insanların 88 faizini öldürür.