Müharibə bu bazarları "VURDU" - Ən çox bahalaşan məhsullar / SİYAHI
Media
11:55 / 04.03.2022
1667
Rusiya-Ukrayna müharibəsi dünyada əsas məhsulların dəyərinin artmasına səbəb olub. Bəzi məhsullarda isə qiymətlər daha sürətlə artır.
Sfera.az qiyməti sürətlə artan məhsulları araşdırıb.
Birja məlumatlarına görə, son bir həftədə qiyməti ən çox artan məhsul buğdadır. Buğdanın dəyəri həftə ərzində 43 faiz artıb. Bir həftə əvvəl bir tonunun qiyməti 315 dollar olan buğdanın dəyəri hazırda 442 dollardır. Buğdanın bir tonu 127 dollar bahalaşıb.
Azərbaycan buğda idxal edən ölkədir və hər il xaricdən 1,3-1,5 milyon ton buğda alır. Buğdanın bahalaşması unun bahalaşmasına, unun bahalaşması isə undan hazırlanan məhsulların, o cümlədən çörəyin bahalaşmasına səbəb olur.
Bahalaşmaya görə ikinci sırada xam neft və neft məhsullarıdır. Həftə ərzində neft qiymətləri 20 faiz, neft məhsullarından benzin 21 faiz, mazut 24 faiz dəyər qazanıb.
Əlvan metalların qiymətində də artım güclüdür. Nikelin bir tonunun dəyəri 16 faiz artaraq 28 178 dollara, alüminiumun qiyməti 14 faiz artaraq 3 824 dollara, sinkin dəyəri 10,5 faiz yüksələrək 4 000 dollara çatıb.
Taxıl məhsullarından buğdadan başqa qarğıdalının da qiyməti xeyli artıb. Qarğıdalının dəyəri 15 faiz artmaqla 305 dollara çatıb.
Adıçəkilən məhsullarla yanaşı həftə ərzində qiymətli metal olan palladiumun bir qramının dəyəri 17 faiz artaraq 90 dollara yüksəlib.
Ağacın qiymətində 11 faizdən çox artım müşahidə edilib.
Ümumilikdə kakao, kofe, balıq və balıq məhsulları istisna olmaqla bütün ərzaq və qeyri-ərzaq məhsullarında qiymət artımı baş verib.
Vasif
