Sfera.az xəbər verir ki, Rusiya-Ukrayna müharibəsi başlayandan bəri dollar rubl qarşısında 40 faizdən çox bahalaşıb. Fevralın 25-də 83 rubl olan bir dollar bu gün 117 rubla yüksəlib. 

 

 

Qeyd edək ki, məhsullar qiymətlərinin formalaşmasına görə 2 qrupa bölünür. 

 

Birinci qrup məhsulların dəyəri beynəlxalq birjalarda ABŞ dolları ilə müəyyənləşir. Həmin məhsulların qiymətinə rublun ucuzlaşması və ya bahalaşması təsir etmir. Məsələn, buğdanın, digər taxıl məhsullarının, neft və neft məhsullarının, əlvan və qara metalların, pambığın, kakao və kofenin, şəkərin, taxtanın və s. əmtəələrin qiymətləri birjalarda formalaşır. 

 

İkinci qrup məhsulların dəyəri isə ölkələrin daxili bazarında müəyyənləşir. Həmin məhsulların qiymətinə milli valyutaların, o cümlədən də rublun məzənnəsindəki dəyişikliyin təsiri var. 

 

Rusiyadan aldığımız belə məhsullar arasında kərə və bitki yağları, ət və ət məhsulları, süd və süd məhsulları, heyvan yemləri, avtomobillər və digər nəqliyyat vasitələri,  elektrik və məişət avadanlıqları, tikinti materialları, şirniyyatlar, şokalad və konfetlər, sous məhsulları, dərmanlar, spirtli və spirtsiz içkilər, şüşə qablar və digər mallar var. Rublun məzənnəsinin dəyişməsi ilə əlaqədar həmin malların ucuzlaşması gözlənilir.  

 

Ancaq rublun dəyər itirməsinin bu malların idxal qiymətinə təsirini tezliklə müşahidə etməyəcəyik. Bunun üçün məzənnənin ən azı 1 ay aşağı səviyyədə qalması lazımdır.

 

Sanksiyaların qalacağı təqdirqdə Azərbaycan istehlakçıları və istehsalçıları rus mallarının qiymətində enişi mart ayının sonlarından və ya ən geci ikinci rübdən başlayaraq aydın hiss edəcək.