Azərbaycan nefti 115 dollardan baha satılacaq - Belə davam edərsə...

 

Sfera.az bildirir ki, bunu iqtisadçı-deputat Vüqar Bayramov deyib. O xatırladıb ki, brent markalı neftin bir bareli 112 dollar təklif olunur və bu, Azərbaycan neftinin 115 dollardan baha satılacağı anlamına gəlir:

"Gündəlik 12 milyon barel neft hasil edən Rusiya istehsalı ilə enerji bazarında qiymətlərə təsir edən dövlətlərdəndir. İnvestorlar genişlənən sanksiyalar fonunda Rusiyanın neft ixracatında dayanmaların olacağından və "qara qızıl" qıtlığının yaranacağından ehtiyatlanırlar. Bu da neftin qiymətinə xüsusi təzyiq yaradır. Bununla belə, müharibə yalnız qiymətləri artırmır, eyni zamanda neft bazarında "köpüklər" yaradır. Bu "köpüklər" isə hər zaman partlaya bilər”.

Millət vəkilinin sözlərinə görə, bu isə o deməkdir ki, qiymətlərin kəskin artımı iqtisadi deyil, psixoloji və siyasi faktorlar ilə bağlıdır:

"Doğrudur, Rusiyaya qarşı sanksiyalar genişlənsə, neft bazarındakı gərginlik hələ bir müddət müşahidə olunacaq. Amma neftin qiyməti müharibənin başlamasına verdiyi reaksiyanı əks olaraq savaşın bitməsinə də verə bilər. Bu halda yenidən neftin qiymətləri ucuzlaşa bilər. Bununla belə, mövcud status-kvo neftin qiymətlərinin artmasını şərtləndirir. Amma neft bazarında uzun müddətli dayanıqlıqdan və stabillikdən danışmaq hələlik mümkün deyil”.