Baxımı 5 saat çəkir: Dünyanın ən uzun quyruqlu atı - FOTO
ABŞ-nin Ohayo ştatında yaşayan Ceni (Jenny) adlı at dünyanın ən uzun quyruqlu atı kimi “Ginnesin Rekordlar Kitabı”na düşüb.
Sfera.az xəbər verir ki, atın quyruğunun uzunluğu 4 metr 12,62 santimetrə çatıb. Beləliklə, Ceni təxminən 19 il ərzində qırılmayan rekordu yeniləyib. Məlumata görə, 25 iyul 2026-cı ildə aparılan ölçmə zamanı Ceninin quyruğunun uzunluğu 412,62 santimetr qeydə alınıb. Əvvəlki rekord 2007-ci ildə quyruğunun uzunluğu 381 santimetr ölçülən “JJS Summer Breeze” adlı ata məxsus olub.
Əsl adı “Mountjoy’s Ice Princess” olan Ceni Makkenzi Lou və Reyçel Estesin himayəsindədir. Amerika Saddlebred cinsinə aid olan at uzun və görkəmli quyruğu ilə seçilir. Sahibləri illərdir onun quyruğunun uzanmasına və sağlam qalmasına xüsusi diqqət yetirirlər. Bu cinsin nümayişlərində uzun quyruğun arzuolunan xüsusiyyətlərdən biri olması da qulluq prosesində mühüm rol oynayır. Ceninin quyruğuna qulluq etmək isə kifayət qədər vaxt tələb edir. Quyruq ayda təxminən bir dəfə və ya ehtiyac yarandıqda yuyulur, qurudulur və dolaşmasının qarşısını almaq üçün hörülür.
Quyruğun açılması, şampunlanması, kondisionerlə işlənməsi, qurudulması, daranması və yenidən hörülməsi orta hesabla 4-5 saat çəkir. Bundan əlavə, quyruğun çirklənməməsi və digər atların ayaqları altında qalaraq zədələnməməsi üçün xüsusi qoruyucu örtükdən istifadə olunur.
Bəsti Rəfizadə
