Günvurma əlamətlərini görən kimi bu tədbirləri görün
Yay aylarında havanın temperaturunun artması ilə günvurma halları da çoxalır. Mütəxəssislər bildirirlər ki, uzun müddət birbaşa günəş şüaları altında qalmaq orqanizmin istilik balansını poza və vaxtında müdaxilə edilmədiyi təqdirdə ciddi sağlamlıq problemlərinə səbəb ola bilər.
Sfera.az xəbər verir ki, günvurma bədənin həddindən artıq isinməsi nəticəsində yaranan təhlükəli vəziyyətdir. Bu zaman orqanizm öz temperaturunu tənzimləyə bilmir və bədən hərarəti təhlükəli həddə yüksəlir. Günvurmanın ən çox rast gəlinən əlamətləri yüksək hərarət, güclü baş ağrısı, başgicəllənmə, ürəkbulanma, qusma, halsızlıq, sürətli nəbz, tez-tez nəfəsalma, əzələ qıcolmaları, çaşqınlıq və bəzi hallarda huşun itirilməsidir.
Mütəxəssislər qeyd edirlər ki, belə əlamətlər müşahidə olunarsa, şəxs dərhal günəş altından uzaqlaşdırılaraq kölgə və ya sərin məkana aparılmalıdır. Bədənin temperaturunu aşağı salmaq üçün soyuq kompres tətbiq edilməli, dar geyimlər boşaldılmalı, huşu yerində olan şəxsə isə az miqdarda su və ya elektrolit tərkibli maye verilməlidir. Huşun itirilməsi, qıcolma və ya yüksək hərarət kimi əlamətlər yaranarsa, dərhal 112 Təcili Tibbi Yardım xidmətinə müraciət olunmalıdır.
Həkimlər günvurmadan qorunmaq üçün günəş şüalarının daha intensiv olduğu 11:00-16:00 saatlarında açıq havada uzun müddət qalmamağı, gün ərzində kifayət qədər su içməyi, açıq rəngli və nazik geyimlər seçməyi, papaq, günəş eynəyi və günəşdən qoruyucu kremdən istifadə etməyi tövsiyə edirlər. Xüsusilə körpələr, yaşlılar, hamilə qadınlar, xroniki xəstəlikləri olan şəxslər və açıq havada çalışanlar günvurma riski yüksək olan qruplar hesab edilir. Buna görə də isti havalarda sadə qoruyucu tədbirlərə əməl etmək sağlamlığın qorunması baxımından böyük əhəmiyyət daşıyır.
Mənsumə