Telefonu yatağa aparanları gözləyən təhlükə açıqladı
Müasir dövrdə bir çox insan yatmazdan əvvəl telefona son dəfə baxmadan yuxuya getmir. Lakin mütəxəssislər xəbərdarlıq edirlər ki, bu adi görünən vərdiş həm yuxu keyfiyyətinə, həm də psixi sağlamlığa mənfi təsir göstərə bilər.
Sfera.az xəbər verir ki, yataqda telefon istifadə etmək və cihazı yaxınlıqda saxlamaq bir sıra sağlamlıq problemlərinə səbəb ola bilər. Xüsusilə gecə saatlarında gələn bildirişlər və ekran işığı yuxu rejimini pozur.
Mütəxəssislərin sözlərinə görə, smartfon ekranlarından yayılan mavi işıq orqanizmdə yuxu hormonu hesab edilən melatoninin ifrazını azaldır. Bu isə yuxuya getməyi çətinləşdirir, yuxunun dərinliyini azaldır və insanın səhər yorğun oyanmasına səbəb olur.
Bundan əlavə, gecə ərzində gələn mesajlar, zənglər və ya bildirişlər beynin tam şəkildə dincəlməsinə mane olur. Nəticədə diqqət dağınıqlığı, stress və zehni yorğunluq kimi problemlər yarana bilər.
Araşdırmalar göstərir ki, telefonla yatmaq vərdişi olan insanlarda narahatlıq və təşviş səviyyəsi daha yüksək olur. Daim əlçatan olmaq hissi gizli stress yaradır, eyni zamanda rəqəmsal asılılığın formalaşmasına zəmin yaradır.
Mütəxəssislər daha keyfiyyətli yuxu üçün telefonu yataqdan uzaqda saxlamağı tövsiyə edirlər. Həmçinin yatmazdan ən azı 30 dəqiqə əvvəl ekran istifadəsini dayandırmaq və bildirişləri söndürmək yuxu keyfiyyətinin yaxşılaşmasına kömək edə bilər.
Kiçik görünən bu dəyişiklik həm fiziki, həm də psixoloji sağlamlığın qorunmasında mühüm rol oynayır.
Mənsumə