“Apple” yeni məhsulunu bazara çıxaracaq

“Apple” şirkətinin süni intellektlə təchiz edilmiş, daxili kameralı yeni nəsil “AirPods Pro” üzərində çalışdığı bildirilir. Məlumatlara əsasən, qulaqlıqlar kameralarla təchiz ediləcək və 2026-cı ildə bazara çıxarılacaq.

Sfera.az xarici mediaya istinadən xəbər verir ki, yeni modelin əsas yeniliyi, süni intellekt əsaslı vizual zəka funksiyalarını dəstəkləməsi və “Apple Vision” cihazları ilə uyğun şəkildə işləməsi olacaq.

Mənbələr qeyd edir ki, kameralı “AirPods Pro”, mövcud “AirPods Pro 3” modelinin yerini tutmayacaq, lakin “Apple”ın məhsul çeşidində premium səviyyəli yeni variant kimi təqdim olunacaq.

Bu addım, şirkətin son dövrlərdə həyata keçirdiyi məhsul müxtəlifləşdirmə strategiyasının davamı sayılır. Qeyd edək ki, “Apple” qısa müddət əvvəl “AirPods 4” modelini iki fərqli versiyada: “Aktiv Səs-küy Azaldılması” (ANC) funksiyalı və funksiyasız variantlarda satışa çıxarmışdı.

Əgər məlumatlar təsdiqlənsə, “Apple” 2026-cı ildə beş fərqli qulaqcıq modelini təqdim edə bilər:

Kameralı “AirPods Pro 3”;
Standart “AirPods Pro 3”;
ANC xüsusiyyətli “AirPods 4”;
Standart “AirPods 4”, və “AirPods Max”.

Ekspertlər hesab edirlər ki, “Apple”ın bu addımı “iPhone”lardakı məhsul strategiyasına bənzər bir yanaşmadır və şirkətin səs texnologiyalarında səs, görüntü və süni intellekti birləşdirən yeni bir mərhələyə keçəcəyini göstərir.

Bəsti Rəfizadə
Sfera.az