Talibandan daha bir qadağa - Əhali dünyadan təcrid oldu
Taliban bu il Əfqanıstanda cəmiyyət həyatını məhdudlaşdıran bir sıra qadağalar tətbiq edib.
Sfera.az xarici mediaya istinadən xəbər verir ki, ölkə bu gün internet və mobil telefon xidmətlərindən məhrum olub.
Taliban səbəb barədə açıqlama verməsə də, son vaxtlar onlayn pornoqrafiya mövzusunda narahatlıqlarını ifadə etmişdi.
2021-ci ildə yenidən hakimiyyətə gələn Talibanın qadınlara və ifadə azadlığına qarşı tətbiq etdiyi məhdudiyyətlər insan hüquqları qrupları və xarici dövlətlər tərəfindən tez-tez tənqid olunur.
Bu il tətbiq edilən əsas qadağalar bunlardır:
17 sentyabrda Taliban “əxlaqsız fəaliyyətləri əngəlləmək” məqsədilə Əfqanıstanın şimalındakı beş vilayətdə – Kunduz, Badahşan, Baqhlan, Tahar və Belh – interneti dayandırıb. Daha sonra qadağa bütün ölkəyə yayıldı.
“New York Times” xəbər verir ki, sentyabrda universitetlərdə qadın müəlliflərin yazdığı kitablar tədris proqramından çıxarılıb. Şəriət qanunları əsas gətirilərək demokratiya, insan hüquqları və qadın fəaliyyəti ilə bağlı 18 dərs proqramdan çıxarılıb.
May ayında şahmat qadağan olunub. Taliban bunun qumara yol aça biləcəyini əsas gətirib. Beynəlxalq Şahmat Federasiyası (FIDE) qərarı pisləyərək, bu addımın idmanın inkişafına və Əfqan oyunçuların bacarıqlarını nümayiş etdirməsinə maneə yaradacağını bildirib.
Dünya Səhiyyə Təşkilatı Talibanı qadın yardımçıların kişi müşayiətçisi olmadan səyahət edə bilməsi üçün çağırıb. Bu xüsusilə şərq Əfqanıstanda baş verən və 2200 nəfərin həyatını itirdiyi zəlzələdən sonra qadınların səhiyyə xidmətlərinə çıxışını təmin etmək məqsədilə vacib hesab olunub.
Buna baxmayaraq, Taliban qadın səhiyyə işçilərinin evdən kənar işləməsini qadağan edən siyasətində dəyişiklik etməyib. 2022-ci ildən bəri bu qadağa qüvvədədir.
Bəsti Rəfizadə
Sfera.az
