"iPhone" buraxılış strategiyasını dəyişir
Texnologiya nəhəngi "Apple" 2026-cı ildən etibarən "iPhone" buraxılış strategiyasını dəyişir.
Sfera.az xarici mediaya istinadla xəbər verir ki, çoxsaylı sızmalara görə, şirkət ənənəvi “nömrəli” flaqmanı atlayaraq iPhone 18-i təqdim etməyəcək. 2007-ci ildən bəri ilk dəfə "Apple" payız təqdimatında əsas modeli buraxmayacaq və diqqətini premium seqmentə yönəldəcək. Şirkətin əsas yeniliyi isə ilk qatlana bilən "iPhone Fold" olacaq.
Məlumatlara görə, 2026-cı ilin payızında "Apple" dörd yeni cihazı təqdim edəcək. Bunların arasında əsas modeli əvəz edəcək "iPhone 18 Air" daha nazik və yüngül korpusla gələcək, tək arxa kameraya sahib olacaq və 5,6 mm qalınlığında ultra nazik dizaynı ilə seçiləcək. Daha güclü xüsusiyyətlərlə çıxacaq "iPhone 18 Pro" və "Pro Max" modelləri isə 6,3 və 6,9 düymlük displeylərlə təqdim ediləcək, yeni kamera sistemləri, aşağı displey Face ID texnologiyası və 2 nanometrlik texnologiyada hazırlanmış A20 prosessoru ilə daha sürətli performans və yüksək enerji səmərəliliyi təmin edəcək. Ən böyük yenilik isə iPhone Fold olacaq.
Bu model Samsung-un "Galaxy Z Fold" seriyasına bənzər, kitab kimi açılan ilk qatlana bilən iPhone kimi bazara çıxarılacaq. O, 7,8 düymlük daxili və 5,5 düymlük xarici ekranla, titan çərçivə və maye metal menteşə ilə gələcək. Qiymətinin 2000–2500 dollar arasında olması gözlənilir ki, bu da onu tarixdə ən bahalı iPhone edəcək.
Əsas "iPhone 18" və onun digər versiyası olan "iPhone 18e" isə 2027-ci ilin yazına qədər təxirə salınacaq. Bu, Apple-ın yeni buraxılış strategiyasını göstərir. Şirkət artıq məhsullarını iki mərhələdə təqdim etməyi planlaşdırır: payızda premium modellər, yazda isə daha münasib qiymətli versiyalar satışa çıxarılacaq. Bununla həm bazarda rəqabət gücləndirilir, həm də il ərzində maraq yüksək saxlanılır.
"Apple" 2026-cı ilin yazında daha sərfəli "iPhone 17e"ni də təqdim edəcək. Bu model 6,1 düymlük OLED ekran, 48 meqapiksellik əsas kamera və daha sürətli A19 prosessoru ilə təchiz olunacaq. Şirkət bununla büdcə seqmentində də mövqeyini qorumağı hədəfləyir.
Mütəxəssislər bildirirlər ki, Apple-ın 2026-cı ilin payızında əsas iPhone 18-dən imtina etməsi premium modellərə yönəlmə, qatlana bilən texnologiyaya xüsusi diqqət və buraxılışların iki mərhələyə bölünməsi ilə bağlıdır.
Bu addım həm satışları stimullaşdırmaq, həm də istehsal və tədarük zəncirini daha çevik idarə etmək məqsədi daşıyır. Eyni zamanda, analitiklər xəbərdarlıq edirlər ki, belə bir strategiya alıcılar üçün məhsul seçimlərini daha da çətinləşdirə bilər və şirkətin uzunmüddətli imicinə təsir göstərə bilər.
Firuzə Əliyeva
Sfera.az
