Təbiət və mədəniyyətin harmoniyası - Qazaxıstandan FOTOREPORTAJ
Qazaxıstan geniş səhraları, ucsuz-bucaqsız dağları, dərin gölləri və zəngin mədəni irsi ilə Asiyanın ürəyində fərqlənən bir ölkədir. Bu ölkə həm təbiət aşiqi səyahətçilər üçün, həm də tarix və mədəniyyət həvəskarları üçün unudulmaz təcrübələr vəd edir.
Sfera.az-ın əməkdaşı Qazaxıstana səfər edərək həm ölkənin təbiət möcüzələri, həm də tarixi-dini abidələri ilə bağlı geniş reportaj hazırlayıb.
Qeyd edək ki, Qazaxıstan ərazisinə görə dünyanın ən böyük ölkələrindən biridir. Qazaxıstanın ərazisi Azərbaycanın ərazisindən təxminən 31-32 dəfə böyükdür. Buna görə də bir səfər zamanı Qazaxıstanın bütün görməli ərazilərini, təbiət guşələrini gəzmək, maraqlı yerlərə baş çəkmək mümkün deyil.
Budəfəki səfərdə əməkdaşımız Almatı vilayətində, Tyan-Şan dağlarının ətəyində yerləşən Kolsay gölü və Almatı şəhərində inşa edilən "Ascension" kilsəsində olub.
Almatı vilayətində, Tyan-Şan dağlarının ətəyində yerləşən Kolsay gölü Qazaxıstanın ən məşhur turistik məkanlarından biridir. “Dağların incisi” adlandırılan bu göl həm təmiz havası, həm də füsunkar mənzərəsi ilə gələnləri valeh edir. Gölün sahilində insanlar milli geyimlərdə şəkillər çəkdirir, Qazaxıstan bayrağını dalğalandıraraq vətənpərvərlik ruhunu nümayiş etdirirlər.
Bölgədə qədim türk ənənələri də yaşadılır. Sakinlər dağlıq ərazidə ox atma yarışları təşkil edir, şahin quşları ilə foto çəkdirirlər. Bu, qəzəllər və atçılıqla yanaşı, qazax xalqının tarixən məşğul olduğu ovçuluq mədəniyyətinin də bu günədək yaşadığını göstərir. Milli geyimdə uşaqların və gənclərin də bu tədbirlərdə iştirak etməsi Qazaxıstanın adət-ənənələrinin gələcək nəsillərə ötürülməsinin bariz nümunəsidir.
Reportajın növbəti ünvanı Almatı şəhərində yerləşən "Ascension" kilsəsi olub. XIX əsrin sonlarında inşa edilən və dünyanın ən hündür pravoslav kilsələrindən biri kimi tanınan bu məbəd, memarlıq üslubu və dayanıqlığı ilə seçilir. Zəlzələlərə davamlı tikilən kilsə həm dini məkan, həm də mədəniyyət abidəsi kimi qorunur.
Kilsənin daxili interyeri xüsusi diqqət çəkir: zəngin ikonalar, qızılı ornamentlərlə işlənmiş ikonostas, freskalar və dini təsvirlər məkanın ab-havasını tamamlayır. İbadət zamanı din xadimlərinin xüsusi mərasim geyimlərində dua etmələri, mum işıqları altında xor ifalarının səslənməsi iştirakçılara dərin mənəvi təsir göstərib.
Kolsay gölündə qədim türk adətləri və milli irs yaşadılırsa, "Ascension" kilsəsi pravoslav dünyasının zəngin tarixi və memarlıq ənənələrini özündə birləşdirir.
Bəsti Rəfizadə
Sfera.az
