Türkiyəli müğənni və aktyor Özcan Deniz ilə qardaşı Ercan Deniz arasında uzun müddətdir davam edən ailədaxili gərginlik yenidən məhkəməlik olub. Məhkəmə hər iki tərəfin bir-biri ilə əlaqə saxlamasını və yaxınlaşmasını qadağan edib.

Sfera.az xarici mediaya istinadən xəbər verir ki, məlumata görə, Özcan Deniz bir müddət əvvəl qardaşı Ercan Deniz barəsində polisə şikayət edərək, “Evimə gələrək məni və ailəmi ölümlə təhdid etdi”, - deyib və uzaqlaşdırma qərarı aldırıb.

Ercan Deniz isə Özcanı “Sosial media və mətbuat vasitəsilə psixoloji şiddət göstərməkdə” ittiham edib. Hər iki qardaş qarşılıqlı olaraq məhkəməyə müraciət edərək qorunma tələb edib.

Mövzu ilə bağlı sonuncu açıqlama isə Ercan Denizdən gəlib. O, iştirak etdiyi maqazin proqramında canlı yayımda qardaşı üçün darıxdığını dilə gətirib. “Özcan üçün çox darıxıram. Qardaşlar olaraq problemimiz yoxdur, hüquqi məsələdir. Ailəliklə çətinliklər yaşamışıq, bəlkə də pulun dəyərini çox bildiyimiz üçün düşüncə qıtlığı yaşayırıq, bilmirəm”, – deyə o, göz yaşlarını saxlaya bilməyib.

Ercan Deniz həmçinin ailədaxili mübahisələrə bacıları Mələyin səbəb olduğunu iddia edib: “Bütün ailəni qarışdıran kiçik bacımız Mələkdir. Özcanla razılaşma edib, bütün əmlakı öz tərəfinə keçirib”.

Canlı yayıma telefonla bağlanan anası Kadriyə Deniz isə övladlarının barışması üçün dua etdiyini bildirib:

“Biz xoşbəxt bir ailə idik. Uğursuz Samar, Özcanın beynini doldurur. Səni Allaha tapşırıram. Rəbbimə yalvarıram ki, iki oğlum bir araya gəlsin”.

Bəsti Rəfizadə
Sfera.az

Məşhur müğənninin qardaşı canlı yayımda ağladı: “Çox darıxıram”