"YouTube" uşaqları izləyəcək - Bəzi hesablar bloklanacaq

“YouTube” avqustun 13-dən ABŞ-də yeni qaydalar tətbiq edəcək. 

Sfera.az xarici mediaya istinadən xəbər verir ki, platforma süni intellekt (AI) texnologiyası vasitəsilə istifadəçilərin yaşını təyin edərək 18 yaşına çatmamış şəxslərə məxsus hesabları müəyyənləşdirəcək.

Sistem həm istifadəçinin hesab açarkən göstərdiyi yaşı, həm də platformadakı fəaliyyətini təhlil edəcək. Əgər profilin yetkinlik yaşına çatmayan şəxs tərəfindən istifadə olunduğu müəyyənləşərsə, həmin istifadəçilərə avtomatik olaraq məhdudiyyətlər qoyulacaq.

Məhdudiyyətlərə yaş senzuralı videolara girişin bloklanması, fərdiləşdirilmiş reklamların söndürülməsi, fasilə vermə bildirişləri və bədən şəkli kimi həssas mövzularla bağlı təkrar tövsiyələrin məhdudlaşdırılması daxildir.

Qərar onlayn uşaq təhlükəsizliyi tədbirlərinin gücləndirilməsi üzrə qlobal tendensiyaya uyğun addım kimi qiymətləndirilir. Qeyd edək ki, bu ilin əvvəlində “Google” istifadəçilərin yaşını hesablamaq üçün maşın öyrənməsindən istifadə etməyi planlaşdırdığını açıqlamışdı. Keçən həftə isə Böyük Britaniyada yetkin məzmunlu saytlara daxil olmaq üçün onlayn yaş yoxlama qaydaları qüvvəyə minib. ABŞ-nin bəzi ştatlarında oxşar qanunlar qəbul edilib, Avropa İttifaqı isə rəqəmsal şəxsiyyət vəsiqələri ilə əlaqəli yaş yoxlama sistemini sınaqdan keçirir.

"YouTube" bildirir ki, sistem yetkinlik yaşına çatmayan hesabları aşkar etdikdə istifadəçilər xəbərdar ediləcək. Əgər səhvən məhdudiyyət tətbiq olunarsa, yaş şəxsiyyət vəsiqəsi yükləməklə, selfi göndərməklə və ya kredit kartı məlumatlarını daxil etməklə təsdiq oluna biləcək.

Bununla yanaşı, platforma məzmun yaradıcılarını xəbərdar edib ki, auditoriyada yeniyetmələrin payının azalması fərdiləşdirilmiş reklamların qadağan olunması səbəbindən reklam gəlirlərinin aşağı düşməsinə səbəb ola bilər.

Fidan Hacızadə

Sfera.az