Duman və zibil - İki yeni fəsil yarandı
Beynəlxalq alimlər qrupu Yer üzündə iki yeni fəslin meydana gəldiyini açıqlayıb.
Sfera.az “Daily Mail” ə istinadən xəbər verir ki, mütəxəssislərin sözlərinə görə, duman mövsümü və zibil mövsümü artıq qlobal iqlim təqviminə möhkəm daxil olub.
Bu hadisələr ekosistemləri pozmaqla yanaşı, milyonlarla insanın sağlamlığını da təhdid edir.
Məlumata görə, duman mövsümü hər il iyundan sentyabr ayına qədər Cənub-Şərqi Asiyanı əhatə edir. İndoneziya və Malayziyada kənd təsərrüfatı məqsədilə tropik torf sahələrinin geniş şəkildə yandırılması tüstünün qonşu ölkələrə - o cümlədən Sinqapur və Taylanda yayılmasına səbəb olur. Bu isə havanın keyfiyyətini kəskin şəkildə pisləşdirərək xəstəliklərin artmasına gətirib çıxarır. Oxşar vəziyyət Hindistanın şimalında qış aylarında müşahidə edilir. ABŞ-də isə əvvəllər yalnız yayla məhdudlaşan meşə yanğınları mövsümü indi yazdan başlayaraq dekabradək davam edir.
Digər narahatedici hadisə zibil mövsümüdür. Balidə hər il dekabrdan mart ayına qədər musson küləkləri və okean axınları çimərliklərə tonlarla plastik tullantı gətirir. Təkcə 2025-ci ildə bir mövsümdə 3000 tondan çox plastik yığılıb. Bənzər vəziyyət Filippin, Tayland və ABŞ-nin şərq sahillərində də qeydə alınıb. Burada güclü yağışlar və çay suları plastik kütləsini okeana daşıyır.
Qeyd edək ki, bundan əvvəl Çin alimləri okeanların həddindən artıq istiləşməsi ilə bağlı iqlim dəyişikliyi barədə xəbərdarlıq etmişdilər.
Fidan Hacızadə
Sfera.az
