Yaponiyada son illərdə yayılan maraqlı xidmətlərdən biri də “nənə kirayəsi” xidmətidir. “OK Grandma” (Yaxşı Nənə) adlanan bu təşəbbüs çərçivəsində vətəndaşlar saatı 23 dollara yaşlı və təcrübəli qadınları kirayə götürə bilirlər.

Sfera.az xarici mediaya istinadən xəbər verir ki, xidmət 2012-ci ildə “Client Services” adlı şirkət tərəfindən yaradılıb.

“OK Oppa-chan” adı ilə də tanınan bu layihə, 60-94 yaş arası qadınları əhatə edir. Kirayə nənələr ev işləri, yemək bişirmə, uşaq baxımı və tədbirlərdə iştirak kimi müxtəlif sahələrdə xidmət göstərirlər. Onların bəziləri isə sadəcə dinləmə, məsləhət vermə və mənəvi dəstək üçün çağırılır.

Şirkət rəsmiləri bildirir ki, yaşlı qadınların fiziki gücü gənclərlə müqayisədə az olsa da, onların həyat təcrübəsi və şəfqəti əvəzolunmazdır. Saytda yer alan açıqlamada deyilir: “Yaşın qazandırdığı ən böyük dəyər, xırda şeylərlə sarsılmamaqdır”.

Müştərilər arasında kirayə nənəni münasibəti bitirmək üçün yanlarında aparanlar da var, toy və digər tədbirlərdə ailə üzvü rolunu oynatmaq istəyənlər də. Hətta gözəl əl yazısına görə seçilən nənələrə də tələb artıb.

“Client Services” şirkəti bununla yanaşı, “Orta Yaşlı Kişi Kirayəsi” (Ossan Rental), “Kök İnsan Kirayəsi” (Debucari) və “Peşəkar Ayrılıq Xidməti” ("Wakaresaseya") kimi başqa qeyri-adi xidmətlər də təqdim edir.

Yaponiyada bu kimi fərqli xidmətlər, cəmiyyətin dəyişən sosial münasibətlərinə uyğun alternativ həll yolları kimi qiymətləndirilir.

Bəsti Rəfizadə
Sfera.az

Yaponiyada sosial yenilik: Nənələr, kök insanlar, kişilər kirayə verilir