Bəzən insanlar uzun illər birlikdə yaşayır, amma artıq bir-birlərinə sevgi hiss etmirlər. Sadəcə rahatlıq və vərdişə görə bir yerdə qalırlar - qonşu, ya bacı-qardaş kimi. "Vərdiş" deyəndə, çox vaxt nəzərdə tuturuq ki, artıq içimizdə ağrı, həyəcan, çırpıntı yoxdur - münasibət sakitcə davam edir.

Sfera.az Milli.Az-a istinadla xəbər verir ki, bu barədə rusiyalı psixoloq Stanislav Samburski danışıb.

"Gəlin, dürüst olaq. Vərdiş nə nəvazişdir, nə də ehtiras. Bu, sadəcə proqnozlaşdırıla biləndir. Bu, beynin əlavə enerji sərf etmədən əvvəlki ssenarini təkrar etməsidir: oyanmaq, qəhvə, səhər yeməyi, "sabahın xeyir", mesencer, iş məsələləri, "gün necə keçdi?" və yatmaq. Bu, təbii ki, rahat bir şey ola bilər, əgər bunun altında emosional əsas varsa. Amma bu, əgər içi boş bir qabıqdan ibarətdirsə, boğucu da ola bilər", - deyə o izah edib.

Onun sözlərinə görə, psixologiyada buna emosional inersiya deyilir: münasibətlər artıq canlı hisslərə görə yox, sadəcə hərəkətin öyrəşilmiş trayektoriyası daha rahat olduğu üçün davam edir. Durub "biz ümumiyyətlə hara gedirik?" sualını vermək əvəzinə, insanlar yola davam edir.

"Ən geniş yayılmış yanlış fikirlərdən biri də budur: guya sevgi həmişə atəşfəşanlıq kimi olmalıdır. Halbuki münasibətin əvvəlindəki emosional fişəngləri hormonlar təmin edir. Zaman keçdikcə, hormonlar sakitləşir, fişənglərin yerini romantik soba tutur, daha sonra isə sadəcə isti bir peç olur. Amma əgər siz artıq uzun müddətdir ki, bu peçin istiliyini hiss etmirsinizsə, həyat yoldaşınıza yaxın olmaq istəmirsinizsə, fikirlərinizi, planlarınızı, hisslərinizi paylaşmırsınızsa - bəlkə bu artıq peç yox, közərmiş küllərdir", - deyə ekspert izah edib.

"Müştərilərim tez-tez deyirlər: "Hər şey yaxşıdır, ərim içki içmir, qışqırmır, pul gətirir. Amma biz otaq yoldaşı kimi yaşayırıq". Qadın başa düşə bilmir, münasibətdə qalmaq istəyirmi? Düşünür: "Bəlkə bu, hamıda belədir, bəlkə mən bir daha heç kimi tapmayacağam". Bax bu "hamıda belədir" ən təhlükəli illüziyalardan biridir. Xeyr, hamıda belə deyil. Və belə olmamalıdır", - deyə ekspert bildirib.

Samburskinin sözlərinə görə, sevgi ilə vərdişi bir-birindən ayırmaq üçün sadə və dürüst bir test var.

"Təsəvvür edin, əriniz yoxdur. O, bir aylıq, hətta bir illik uzağa gedib. Nə hiss edirsiniz? Rahatlıq? Boşluq? Azadlıq sevinci? Həyat tərzinə görə kədər? Yoxsa məhz ona görə darıxırsınız?

Hisslər böyük sözlərdə gizlənmir. Onlar kiçik impulslardır. Onun səsini eşitmək istəyi. Gülməli bir şəkil göndərmək arzusu. Necə çatdığı ilə maraqlanmaq istəyi. Bu - canlı iştirakdır. Vərdiş isə budur: siz bilirsiniz ki, o çatacaq. Çünki həmişə çatır və... sizə fərqi yoxdur", - deyə psixoloq qeyd edib.

Bəs niyə insan hər şey aydın olduğu halda belə ayrılmaqdan qorxur? Çünki vərdiş - təhlükəsizlik illüziyasıdır:

"Biz bir yerdəyik - deməli, tək deyiləm. Birlikdə yaşayırıq - deməli, hər şey qaydasındadır. O, pis insan deyil". Amma "pis insan deyil" - sevgi deyil. Bu, sadəcə rezyumedəki bir cümlədir. Psixologiyada buna koqnitiv dissonans deyilir, yəni insanın daxili hissləri ilə davranışı uyğun gəlmir. Məsələn, siz başa düşürsünüz ki, artıq sevmirsiniz, amma yenə də birgə gələcək planları qurursunuz. Çünki qorxursunuz. Çünki "şikayət edəsi bir şey yoxdur". Çünki "nə deyəcəklər?"

Əgər hiss edirsinizsə, sevgi keçib, bəs onda nə etməli?

Bununla belə Stanislav Samburski tez qərar verməməyə, tələsik ayrılmamağa çağırıb.

"Əvvəlcə başa düşün: nə keçib? Bəlkə sevgi yox, sadəcə resurs bitib? Bəlkə bu, son yox, böhrandır? Danışın. Susaraq hissləri içəridə saxlamaq - bu münasibətlərin altına saatlı bomba qoymaqdır.

Bədəninizə qulaq asın. Bəzən sevgi ona görə yox olur ki, siz artıq öz bədəninizi tərk etmisiniz - tükənmə, yorğunluq, həddindən artıq yüklənmə səbəbindən. Bədən yalan danışmaz. Əgər partnyorunuzun yanında nəfəs ala bilmirsinizsə - bu, siqnaldır. Dürüst suallar verməkdən qorxmayın. Hətta cavab qorxuducu olsa belə. Əgər qorxursunuzsa, təkliyə yox, dəstəyə gedin. Konsultasiyalar, qruplar, etibarlı mühit - bunlar daxili dünyanızı ayırmaq və özünüzü yenidən toplamaq üçün vacibdir", - deyə ekspert məsləhət verib./oxu.az

Sevginin bitdiyini və sadəcə vərdişə çevrildiyini necə anlamaq olar?