ABŞ-li alimlər Günəşin səthinin indiyədək qeydə alınmış ən detallı görüntüsünü əldə ediblər.

Sfera.az xarici mediaya istinadən xəbər verir ki, ABŞ Milli Elm Fonduna bağlı Günəş Rəsədxanasının (NSO) tədqiqatçıları Havaydakı Daniel K. Inouye Günəş Teleskopu vasitəsilə Günəşin səthində 20 kilometr enində incə parlaq və qaranlıq zolaqlar müşahidə ediblər.

Bu zolaqlar “qranul” adlanan isti qaz hüceyrələrinin kənarında yaranır və maqnit sahələrinin yaratdığı işıq-kölgə oyunu nəticəsində formalaşır. Parlaq sahələr güclü, tünd bölgələr isə zəif maqnit sahələrini göstərir.

Tədqiqatın müəllifi Dr. David Kuridze bildirib ki, bu müşahidə Günəş səthinin 20 kilometrlik yüksək dəqiqliklə araşdırılmasına imkan verib: “Bu naxışlar maqnit sahələrinin incə strukturunu üzə çıxarır”.

NSO mütəxəssisi Dr. David Boboltz isə qeyd edib ki, bu texnologiya Günəşi anlamaqda yeni dövrün başlanğıcıdır:

“Kosmik hava şəraitini daha düzgün proqnozlaşdırmaq üçün bu kiçik miqyaslı proseslər mühümdür”.

Görüntülər “G-bəndi” adlanan xüsusi işıq aralığında çəkilib. Zolaqların arxasında dayanan zəif maqnit dalğalanmaları Günəş səthində bir neçə kilometrlik dəyişikliklərə səbəb olur. Bu nadir hal “Wilson çöküntüsü” adlanır və yalnız bu dəqiqliklə müşahidə edilə bilir.

Alimlərə görə, Günəşin belə incə maqnit quruluşları ilk dəfə bu qədər aydın şəkildə görüntülənib.

Bəsti Rəfizadə
Sfera.az

Günəşin ən dəqiq görüntüsü əldə olundu - FOTO