“Instagram” sosial şəbəkəsi yeni bir funksiyanı – “repost” (yenidən paylaşma) xüsusiyyətini test etdiyini rəsmi olaraq təsdiqləyib.

Sfera.az xarici mediaya istinadən xəbər verir ki, şirkət rəsmisi “TechCrunch”a verdiyi açıqlamada bildirib ki, bu yenilik istifadəçilərə digər hesabların paylaşdıqları postları birbaşa öz ana lentlərində paylaşmağa imkan verəcək.

Bu xüsusiyyət “X” (keçmiş Twitter) platformasının “retweet” funksiyasına bənzəyir və ilk dəfə 2022-ci ildə test mərhələsində görüntülənmişdi. Yeni sistem “Instagram”da məzmun yayımı və paylaşım dinamikasına ciddi təsir göstərə bilər.

İndiyədək istifadəçilər digər paylaşımları bölüşmək üçün ekran görüntüsü almaq və ya üçüncü tərəf tətbiqlərdən istifadə etməli olurdular. Yeni “repost” funksiyası isə bu prosesi xeyli asanlaşdıracaq və maraqlı məzmunların daha sürətli yayılmasına şərait yaradacaq.

Bu yenilik sosial şəbəkə istifadəçiləri arasında mübahisələrə səbəb olub. Bir qrup istifadəçi asan paylaşım imkanını müsbət qarşılayır, digərləri isə Instagram lentinin daha da qarışıq hala gələcəyindən narahatdır.

Mütəxəssislər hesab edirlər ki, bu funksiya xüsusilə kontent yaradıcıları üçün faydalı olacaq. Onların paylaşımlarının başqaları tərəfindən rahat şəkildə yenidən paylaşılması, izləyici auditoriyalarını genişləndirmək və daha çox görünürlük əldə etmək üçün əlavə imkan yaradacaq. Bundan əlavə, yeni sistem yenidən paylaşılan postlarda orijinal müəllifin avtomatik olaraq etiketlənməsini təmin edəcək ki, bu da platformada tez-tez qarşılaşılan “mənbə göstərilmədən paylaşım” probleminin qarşısını almağa kömək edə bilər.

Bəsti Rəfizadə
Sfera.az

“İnstagram” yeni “repost” funksiyasını test edir - Maraqlı