Misirdəki Giza Piramidasında aparılan yeni araşdırmalar, insanlıq tarixini kökündən dəyişdirə biləcək inanılmaz bir iddianı gündəmə gətirib. İtalyan tədqiqatçılardan ibarət beynəlxalq bir komanda, radar və tomoqrafiya texnologiyalarının köməyi ilə Giza piramidalarının altında yerləşən 600 metr dərinliyində nəhəng bir yeraltı kompleksin izlərinə rast gəldiklərini açıqlayıb.

Sfera.az xarici mediaya istinadən xəbər verir ki, xüsusilə Xefren (Kefren) və Menkaure piramidalarının altında sütunabənzər strukturların aşkarlanması, bu quruluşların bir-biri ilə əlaqəli böyük bir yeraltı şəhərin parçası ola biləcəyini göstərir.

Radar görüntüləri, bu sütunların spiral formada düzülmüş və səkkiz əsas dayağı əhatə edən geniş miqyaslı bir arxitektura planını üzə çıxarıb. Menkaure piramidanın daha kiçik olması səbəbilə burada daha az sütun olduğu təxmin edilir və funksional baxımdan bənzərliyə malikdir.

"Strathclyde" Universitetindən radar mütəxəssisi Filippo Biondi, əldə olunan məlumatların Giza piramidalarının yalnız səthdə gördüyümüz strukturlar olmadığını, əslində yerin altında çox daha böyük və mürəkkəb bir kompleksin üst hissəsi ola biləcəyini deyib. Onun sözlərinə görə, bu yeraltı sistem hava, su, torpaq və od kimi təbii elementlərlə əlaqəli ritual və ya funksional sahələr ola bilər.

Tədqiqatçılar, bu strukturların təxminən 12 min 800 il əvvəl yerə çırpılan bir quyruqlu ulduzun yaratdığı qlobal fəlakət nəticəsində yox olan qədim, inkişaf etmiş bir sivilizasiyaya aid ola biləcəyini iddia edirlər. Onların fikrincə, bu sivilizasiyanın sağ qalan üzvləri öz biliklərini sonrakı nəsillərə ötürərək Misir və digər qədim mədəniyyətlərin əsasını qoyublar.

Təklif olunan bu nəzəriyyə, “Yaradılış adası” və ya “Ruhun yeraltı dünyası” kimi mifoloji anlayışlarla da uyğunluq təşkil edir. Edfu Məbədindəki qədim mətnlərdə belə bir fəlakət nəticəsində “Ən yaşlılar” adlı mədəniyyətin məhv olmasından bəhs edilir. Məlumatlara görə, bu sivilizasiya düşmən bir “ilan” tərəfindən, yəni bəlkə də bir quyruqlu ulduzun simvolu yox edilib.

Bununla belə, Misirin məşhur arxeoloqu Zahi Havass bu iddiaları kəskin şəkildə tənqid edib və radar texnologiyasının yerin bu qədər dərin qatlarına nüfuz edə bilməyəcəyini, tapıntıların elmi əsaslara söykənmədiyini bildirib.

Əgər bu iddialar sübuta yetirilərsə, bu kəşf insanlıq tarixində inqilabi bir dönüş nöqtəsi ola bilər.

Bəsti Rəfizadə
Sfera.az

Piramidaların altında şəhər tapıldı: 13 minillik sirr - FOTOLAR