II Dünya müharibəsinə aid bombalar tapıldı: Fövqəladə vəziyyət elan edildi - FOTOLAR
Almaniyanın Köln şəhərində aparılan tikinti işləri zamanı II Dünya müharibəsindən qalmış üç partlamamış bomba aşkarlanıb. Hadisə səbəbilə şəhərdə fövqəladə vəziyyət elan edilib və 20 mindən çox insanın genişmiqyaslı təxliyə əməliyyatına start verilib.
Sfera.az “Hürriyet”ə istinadən xəbər verir ki, Ren çayı sahilində yerləşən Deutz gəmiqayırma zavodu yaxınlığında aşkar edilən bombalardan ikisinin 20 ton, birinin isə 10 ton ağırlığında olduğu bildirilir.
Rəsmilər məlumat veriblər ki, bombalar ABŞ istehsalıdır və sərt səthə toxunduqda partlama təhlükəsi daşıyan xüsusi fitillərlə təchiz olunub.
Təhlükəsizlik məqsədilə şəhərin əsas nəqliyyat infrastrukturu, Ren çayı üzərindəki üç körpü, Kölnün əsas dəmiryolu stansiyası, bir xəstəxana, orkestra zalı, muzey, iki qocalar evi, bələdiyyə binası, çoxsaylı uşaq bağçaları və bəzi ictimai binalar müvəqqəti bağlanıb. RTL televiziya kanalı da binasını boşaldaraq yayımını Berlinə köçürüb.
Polis qüvvələri səhər saatlarından etibarən evləri qapı-qapı gəzərək sakinləri təxliyə ilə bağlı məlumatlandırıb. Rəsmilərin açıqlamasına görə, könüllü şəkildə ərazini tərk etməyən şəxslər məcburi şəkildə uzaqlaşdırılacaq.
Alman komediyaçı Tedros Teklebrhanın “Lanxess Arenada” planlaşdırılan tamaşası bazar gününə təxirə salınıb. Şəhər rəhbərliyi bildirib ki, təxliyə olunan şəxslər üçün təhlükəsiz zonalarda yerləşən idman zalları, kilsələr və xüsusi çadırlar ərzaq, içki və digər yardımlarla təmin ediləcək.
Mütəxəssislər bombaların zərərsizləşdirilməsi əməliyyatına yalnız bütün ərazinin tam təxliyəsindən sonra başlaya biləcəklərini vurğulayıblar.
Xatırladaq ki, Köln şəhəri II Dünya müharibəsi dövründə 262 hava hücumuna məruz qalıb. Aşkarlanan bombaların konkret hansı tarixdə atıldığı isə hələlik məlum deyil.
Bəsti Rəfizadə
Sfera.az
