120 illik şüşədən çıxan məktub: "Rus qamçısının tərindən inləyirik" - FOTO
Polşada yerləşən 16-cı əsrə aid "Benardine" monastırında aparılan bərpa işləri zamanı içərisində məktub olan 120 illik bir şüşə aşkar edilib. Tapıntı, monastırın qapı qülləsində görülən konservasiya işləri zamanı ortaya çıxıb.
Sfera.az xarici mediaya istinadən xəbər verir ki, 9 may 1905-ci il tarixinə aid məktub, Kazimierz Biskupi kəndində yaşayan dəmirçi Karol Şults tərəfindən yazılıb.
Məktub, o dövrdə Polşanın Rusiya İmperiyasının hakimiyyəti altında yaşadığı çətinlikləri əks etdirir. Şults yazır: “Rusiya imperatoru Nikolayın hakimiyyəti altında biz polyaklar üçün həyat dəhşətlidir. Rus qamçısının tərindən inləyirik”.
Məktubda həmçinin 1904–1905-ci illər Rusiya-Yaponiya müharibəsinə də toxunulur. Müəllif bu müharibəni “dünyanın başlanğıcından bu yana görülməmiş bir fəlakət” adlandırır və təxminən bir milyon insanın öldüyünü qeyd edir.
Karol Şults məktubun sonunda kəndin keşişi I. Malaxovskiyə təşəkkür edir və onun ağır dövrdə könüllü ianələrlə yeni bir kilsə tikdiyini bildirir.
Kazimierz Biskupi bələdiyyə başçısı Qreqorj Maceyyevski sosial şəbəkədəki paylaşımında bu tapıntını belə şərh edib:
“Bu məktub bizim üçün böyük bir sürpriz oldu. 120 il əvvəl kəndimizdə yaşamış Karol Şults tərəfindən yazılan bu məktub, Rusiya işğalı altındakı həyat haqqında bizə dəyərli tarixi məlumatlar verir”.
Tapılan məktub bir növ zaman kapsulu kimi qəbul olunur və tədqiqatçılar tərəfindən tarixi sənəd kimi qiymətləndirilir.
Bəsti Rəfizadə
Sfera.az
