Maskın atası qatil olduğunu etiraf etdi: “Qızımı yemək istəyirdilər”

İlon Maskın atası İrrol Maskın 1998-ci ildə Cənubi Afrikada baş vermiş silahlı insidentdə üç nəfəri öldürdüyü məlum olub. Mühəndis olan İrrol Mask qatıldığı bir podkast verilişində, evlərinə basqın edən silahlı şəxslərə qarşı silahla cavab verdiyini və bu yolla 6 yaşlı qızını xilas etdiyini bildirib.

Sfera.az xarici mediaya istinadən xəbər verir ki, hadisə İlon Maskın da anadan olduğu Cənubi Afrikanın Yohannesburq şəhərinin Sandton bölgəsində baş verib.

Mask həmin gün qızı Ali ilə birgə kirayə qalanların köçəcəyi mülkə baş çəkməyə gedib və ehtiyat məqsədilə silah daşıyıb. Onun sözlərinə görə, qızı vanna otağında olarkən salondan gələn səsləri eşidib və oraya keçəndə 7-8 nəfərlə qarşılaşıb. Onlardan biri ona “Sizə necə kömək edə bilərik?” deyə sual verdikdən sonra atəş açıb.
İrrol Mask 20 illik karate təcrübəsi sayəsində tez reaksiya verdiyini və cavab olaraq yalnız iki dəfə atəş açaraq iki nəfəri öldürdüyünü, birini isə yaraladığını deyib. Üzərinə ümumilikdə 52 dəfə atəş açıldığını iddia edən Mask, hadisədən sonra qızını da götürərək ərazidən uzaqlaşıb.

Əvvəlcə ona qarşı “qətil” ittihamı irəli sürülsə də, istintaq nəticəsində hadisənin “qanuni müdafiə” olduğu təsdiqlənib və İrrol Mask bəraət qazanıb.

Daha sonra verdiyi açıqlamada Mask hücum edən şəxslərin qızını “cadugərlik üçün istifadə edərək yeyə biləcəklərini” iddia edib. “Polis mənə dedi ki, qızımı dərman və rituallar üçün istifadə edə bilərdilər. Başını qaynadıb taksi güzgüsündən asa bilərdilər”, – deyə o bildirib.

Hadisə nəticəsində sağ qulağında eşitmə qabiliyyətini itirdiyini deyən İrrol Mask silahı olmasaydı həyatını və qızını xilas edə bilməyəcəyini vurğulayıb.

Bəsti Rəfizadə
Sfera.az