ABŞ-nin Arkanzas ştatında yerləşən və dünyada yeganə olan "Crater of Diamonds" Dövlət Parkı ziyarətçilərə real almaz axtarıb tapmaq və onu özləri ilə aparmaq imkanı yaradır. 1972-ci ildən etibarən ictimaiyyətə açıq olan bu ərazidə indiyədək 35 mindən çox almaz aşkarlanıb.

Sfera.az xarici mediaya istinadən xəbər verir ki, parkın yerləşdiyi ərazi qədim vulkanik kraterin üzərindədir və bu da almazların əmələ gəlməsi üçün ideal geoloji şərait yaradır.

Burada almazdan əlavə ametist, qranat, akik, yasper və kvars kimi digər qiymətli daşlara da rast gəlinir.

Ziyarətçilər parkda üç əsas üsulla almaz axtara bilirlər:

• Səthi axtarış – yerin üzərində parıltılı daşları vizual olaraq tapmaq,
• Yaş ələmə – torpağı su ilə süzüb daşları ayırmaq,
• Quru ələmə – eyni prosesi su olmadan yerinə yetirmək.

Tapılan daşlar parkın mütəxəssisləri tərəfindən pulsuz olaraq analiz edilir, ölçülür və rəsmi sertifikatla sənədləşdirilir. Ən önəmlisi isə tapılan daş ziyarətçiyə məxsus sayılır və onunla birlikdə aparıla bilər.

Yaxın günlərdə baş verən bir hadisədə, ailəsi ilə parkı ziyarət edən David De Kook torpaqda tapdığı və əvvəlcə şokolad kağızı sandığı bir cismin 3,81 karatlıq səkkizbucaqlı almaz olduğunu anlayıb. Bu tapıntı onun həyatını dəyişdirib.

Arkanzasın Murfreesboro şəhəri yaxınlığında yerləşən bu park, dünyada almaz tapılmasına və həmin daşın tam şəkildə tapana məxsus olmasına icazə verilən yeganə dövlət parkı kimi tanınır. Park hər il minlərlə ziyarətçini xəzinə tapmaq ümidi ilə cəlb edir.

Bəsti Rəfizadə
Sfera.az

Bu parka gedənlər evlərinə varlanaraq dönürlər - FOTO