Günahsız olduğu bilindi - 38 ildən sonra azadlığa buraxıldı - FOTO
1987-ci ildə törədilən qətldə təqsirləndirilərək 38 il həbsdə saxlanılan Böyük Britaniya vətəndaşı 68 yaşlı Piter Sallivanın cinayət hökmü yeni genetik sübutlarla ləğv olunub.
Sfera.az xarici mediaya istinadən xəbər verir ki, Cinayət İşləri üzrə İstintaq Komissiyası (CCRC) sifarişi ilə aparılan son DNT analizləri nəticəsində məlum olub ki, Sallivanın DNT-si hadisə yerindən toplanmış nümunələrdə tapılmayıb. Analizlər, əksinə, “naməlum bir kişi”yə aid profili göstərib.
Sallivan, 21 yaşlı gülçü və bar işçisi Dayan Sindallın qətli ilə bağlı təqsirləndirilərək həbs edilmişdi. Hadisə günü gənc qadının maşını xarab olmuş, o isə benzin məntəqəsinə doğru gedərkən hücuma məruz qalmış və qəddarcasına öldürülmüşdü.
Sallivan həmişə günahsız olduğunu bildirmiş və vəkilləri iki dəfə hökmün ləğvi üçün müraciət etmişdi. Lakin bu müraciətlər nəticəsiz qalmışdı.
Hazırda Sindallın qətli ilə bağlı istintaq yenidən açılıb. Lakin milli DNT bazasında aparılan araşdırmalar hələlik heç bir nəticə verməyib.
Hadisə, Britaniya məhkəmə tarixində ən uzun müddətli səhv mühakimələrdən biri kimi tarixə düşüb.
Bəsti Rəfizadə
Sfera.az
