Evini təmir etdirdi, xeyli varlandı - Maraqlı hadisə

İspaniyanın Luqo şəhərində yaşayan Tono Pineiro adlı şəxs yeni aldığı evində təmir işləri apararkən gözlənilməz bir tapıntı ilə qarşılaşıb. Uzun illərdir tərk edilmiş vəziyyətdə olan evi “Facebook” üzərindən bəyənib alan Pineiro, divarların içində altı ədəd “Nesquik” qutusu aşkarlayıb. Qutuların içindən isə böyük məbləğdə köhnə İspan pesetaları (avrodan öncə istifadə edilən milli valyuta - red.) aşkarlanıb. Pesetalar 65 min dollar və ya 110 min manat dəyərində olub.

Sfera.az xarici mediaya istinadən xəbər verir ki, bu tapıntı Pineiro üçün uzunmüddətli sevinc gətirməyib. Çünki tapılan pullar İspaniyada 2002-ci ildə avroya keçid zamanı dövriyyədən çıxarılmış banknotlar olub. Üstəlik, bəzi banknotlar o qədər köhnə olub ki, artıq avroya çevrilməsi mümkün deyil. Bank rəsmiləri bu tip köhnə pulların dəyişdirilməsi üçün son müddətin çoxdan keçdiyini bildirib və pulların bir hissəsinin dəyərsiz olduğunu açıqlayıb.

Buna baxmayaraq, Pineiro nisbətən yeni tarixli banknotların bir qismini dəyişdirərək vəsaiti xilas edə bilib. O, bu pulla evin dam örtüyünü yenilədiyini və qalan bir neçə köhnə banknotu isə xatirə olaraq saxladığını bildirib.

Pineiro pulların nəm və zədələnmədən qorunması məqsədilə “Nesquik” qutularına qoyularaq divarlarda gizlədildiyini ehtimal edir. “Bəzi qutular zədələnmişdi, amma digərləri sanki yeni ütülənmiş kimi görünürdü, bu inanılmaz bir tapıntı idi”, – deyə o, təəssüratlarını bölüşüb.

Bəsti Rəfizadə
Sfera.az