Dünyanın ən qədim futbol meydanı - Bu ölkədə aşkarlandı - FOTO
Şotlandiyanın Solvay Firs bölgəsində dünyanın ən qədim futbol meydanı olduğu ehtimal edilən bir ərazi aşkar edilib. İdman tarixçisi Ged Obrienin araşdırmalarına görə, 1600-cü illərin əvvəllərində bu sahədə müntəzəm futbol oyunları keçirilirmiş.
Sfera.az xarici mediaya istinadən xəbər verir ki, kəşfin əsasını rahib Samuel Rutherford tərəfindən yazılmış məktub təşkil edib.
Məktubda bazar günləri camaatın bu sahədə futbol oynadığı qeyd olunur və bunu dayandırmaq üçün əraziyə böyük daşlar düzülməsi əmr edilir. Obrien həmin daşların bu gün də yerində olduğunu bildirir.
Şotlandiya Futbol Muzeyinin yaradıcısı Obrayen bu sahənin müasir futbolun təkamülü üçün son dərəcə vacib olduğunu qeyd edir:
"Bu meydanda qaydalara uyğun komandaların oynadığı müntəzəm matçlar keçirilirdi. O, müasir futbolun əcdadıdır. Həmin əcdad da şotlandiyalıdır".
Bu tarixi kəşf təsdiqlənərsə, İngiltərədə futbolun mənşəyini 200 il geri çəkə bilər. Bu, həm də Şotlandiya komandalarının 1870-ci illərdə beynəlxalq səhnədə ingilis rəqiblərini nə üçün darmadağın edə bildiklərini izah edə bilər.
"Beynəlxalq futbol 1872-ci ildə başlayanda Şotlandiya klubları ingilisləri darmadağın edirdi. Təəccüblü deyil, çünki onlar bu oyunu 200 ildir oynayırdılar", - Obrien deyib.
Yeni tapıntılar futbol tarixinin yenidən yazılmasına səbəb ola bilər.
Bəsti Rəfizadə
Sfera.az
