ABŞ-də qeyri-rəsmi olaraq qeyd olunan “Ulduz Müharibələri Günü” (4 may) münasibətilə Ağ Ev Prezident Donald Trampın süni intellekt vasitəsilə hazırlanmış döyüşçü obrazını əks etdirən paylaşım edib.

Sfera.az xəbər verir ki, paylaşım sosial şəbəkə platforması “X” üzərindən yayımlanıb.

Fotoda 78 yaşlı Tramp əzələli və güclü bir obrazda, “Ulduz Müharibələri ” filmini xatırladan bir afişada əsas qəhrəman kimi təqdim olunub. O, işıq qılıncı ilə “Sith” – yəni şər qüvvələrin təmsilçilərinə qarşı mübarizə aparan obrazda göstərilib. Afişanın fonunda ABŞ bayraqları və ölkənin milli simvollarından olan iki kel kartal yer alır.
Sözügedən paylaşımda aşağıdakı ifadələrə yer verilib:

“"Sith" krallarını, qatilləri, narkotik baronlarını, təhlükəli məhkumları və MS-13 cinayətkar dəstəsinin üzvlərini qalaktikamıza qaytarmağa çalışan radikal solçu dəlilər də daxil olmaqla hər kəsə Xoşbəxt 4 May!”.

Paylaşım sosial mediada müxtəlif reaksiyalara səbəb olub. Bəziləri Trampın qəhrəman kimi təqdim olunmasını alqışlasa da, digərləri “Sith” simvolikası ilə bağlı ziddiyyətli məqamları tənqid ediblər.

Məlum olduğu kimi, “Ulduz Müharibələri” kainatında qırmızı işıq qılıncı və “Sith” anlayışı adətən mənfi obrazlarla əlaqələndirilir.

Mütəxəssislər Ağ Evin bu paylaşımını siyasi mesajları pop mədəniyyətlə birləşdirərək ictimai diqqəti cəlb etmək cəhdi kimi qiymətləndirirlər.

Bəsti Rəfizadə
Sfera.az

Tramp “Ulduz Müharibələri” qəhrəmanı oldu: Ağ Evdən diqqətçəkən paylaşım - FOTO