Okeanda yaşamış dəniz canavarının qalıqları aşkarlandı - FOTO

ABŞ-də aparılan qazıntılar zamanı, bir zamanlar okeanlarda "hökmran olan" nəhəng dəniz sürünəni Mosasaurun qalıqları tapılıb. Təxminən 82–66 milyon il əvvəl yaşamış bu vəhşi heyvanın yalnız bir onurğa sümüyü aşkarlanıb.

Sfera.az “NTV”yə istinadən xəbər verir ki, kəşf, Missisipi ştatında olub və bu sümük, ərazidə indiyədək tapılan ən böyük fosil (canlıların qalıqları - red.) ola bilər.

Geoloq Ceyms Starns, yerli mediaya açıqlamasında, “Bu, əsl dəniz canavarıdır. Bir Mosasaurun çata biləcəyi ən böyük ölçü budur”, - deyə bildirib.

Mosasaurların uzunluğu 15 metrə, çəkisi isə 9 tona çatırdı. Bu canlılar dövrün ən güclü yırtıcılarından sayılırdı. Hətta onların ölçüləri bir çox quruda yaşayan dinozavrları belə geridə qoyurdu.

Tapılan sümük, bir vaxtlar tamamilə su altında qalmış ərazidə aşkarlanıb. 

Alimlər hesab edirlər ki, yeni tapılan Mosasaur digər dəniz sürünənlərini ovlaya biləcək dərəcədə güclü və inkişaf etmişdi. Bu canlılar, 66 milyon il əvvəl baş vermiş və Yer üzündəki növlərin 75%-ni məhv etmiş kütləvi məhvolma hadisəsi zamanı tamamilə yox olmuşdular.

Bəsti Rəfizadə
Sfera.az