ABŞ bu tarixi “Qələbə Günü” kimi qeyd edəcək
ABŞ Prezidenti Donald Tramp 8 may tarixinin İkinci Dünya müharibəsinin sona çatması münasibətilə “Qələbə Günü” kimi qeyd olunması barədə qərar verdiyini açıqlayıb.
Sfera.az xəbər verir ki, Tramp bu barədə “Truth Social” sosial media platformasında paylaşım edib.
O, ABŞ-nin həm Birinci, həm də İkinci Dünya müharibəsindəki rolunu vurğulayaraq, bu müharibələrin qazanılmasında ölkəsinin digər dövlətlərdən daha çox şey etdiyini bildirib.
Tramp açıqlamasında, “Qələbələrimizi yenidən qeyd etməyə başlayacağıq”, – deyə bildirib və əlavə edib ki, 8 may İkinci Dünya müharibəsində, 11 noyabr isə Birinci Dünya müharibəsində “Qələbə Günü” kimi qeyd ediləcək.
“Biz hər iki müharibəni qazandıq. Güc və cəsarət baxımından bizə yaxın heç kim yox idi. Lakin artıq heç nəyi qeyd etmirik. Çünki bunu necə edəcəyini bilən liderlərimiz yoxdur”, – deyə Tramp qeyd edib.
Hazırda ABŞ-də 11 noyabr “Veteranlar Günü” kimi qeyd olunur. Ağ Ev isə hələlik Trampın bu təşəbbüsü ilə bağlı rəsmi mövqe bildirməyib.
Qeyd edək ki, 1945-ci ilin 8 may tarixində nasist Almaniyası İkinci Dünya müharibəsində şərtsiz təslim olma aktını imzalayaraq Avropada müharibəyə son qoymuşdu.
Bəsti Rəfizadə
Sfera.az
