“Microsoft”un qurucusu Bill Qeytsin şəxsi həyatı ilə bağlı illərlə gizli saxlanılan bir məlumat gündəmin əsas müzakirə mövzularından birinə çevrilib. Milyarderin 22 yaşlı qızı Foebe Qeyts atasının sağlamlıq vəziyyəti ilə bağlı əvvəllər açıqlanmamış bir faktı təsadüfən ictimailəşdirib.

Sfera.az “Sözcü”yə istinadən xəbər verir ki, hazırda Stanford Universitetində təhsil alan Foebe Qeyts “Call Her Daddy” adlı məşhur podkasta qonaq olub.

Veriliş zamanı aparıcı Aleks Kuper ilə söhbətində atasının sosial davranışlarını təsvir edən Foebe, “Atam sosial baxımdan olduqca bacarıqsızdır. O, özünün Asperger sindromu (psixi pozğunluq - red.) olduğunu deyib”, – deyə bildirib.

Bill Qeyts daha öncə autizm spektrinə aid xüsusiyyətlər daşıdığını etiraf etsə də, bu vaxta qədər hər hansı rəsmi diaqnoz açıqlamamışdı. Qızının bu etirafı isə ilk dəfə ailə daxilindən gələn birbaşa tibbi məlumat kimi qiymətləndirilib.

Hadisə ictimaiyyət arasında geniş rezonans doğurub. Sosial mediada mövzu ilə bağlı müxtəlif fikirlər səsləndirilib, bəziləri bu məlumatın təəccüblü olmadığını desə də, digərləri diaqnozun qeyri-peşəkar şəkildə dilə gətirildiyini vurğulayıb.

Bill Qeyts hələlik məsələ ilə bağlı hər hansı açıqlama verməyib.

Xatırladaq ki, milyarder 2023-cü ildə nəşr olunan “Source Code” adlı xatirə kitabında uşaqlıqda sosial münasibətlərdə çətinlik çəkdiyini, müəyyən mövzularda həddindən artıq fokuslandığını və indiki dövrdə olsaydı, bəlkə də ona autizm spektr pozuntusu diaqnozu qoyulacağını qeyd etmişdi. “Bəzən işimə elə qapılırdım ki, yemək yeməyi belə unudurdum” , – deyə Qeyts o dövrü təsvir etmişdi.

Bəsti Rəfizadə
Sfera.az

Bill Qeytsin sirrini qızı açıqladı: "Atamın Asperger sindromu var"