İlon Maskın qurucusu olduğu “Neuralink” şirkəti beyin-kompüter interfeysi sahəsində daha bir mühüm uğura imza atıb.

Sfera.az Türkiyə mediasına istinadən xəbər verir ki, şirkətin beyin implantını alan üçüncü şəxs və Amyotrofik Yan Skleroz (ALS) diaqnozu qoyulmuş ilk pasiyent olan Brad Smith texnologiya sayəsində yenidən ünsiyyət qura bildiyini açıqlayıb.

ALS səbəbilə yalnız gözlərini və ağzının kənarlarını tərpədə bilən Smith, “Neuralink”in inkişaf etdirdiyi implant vasitəsilə “MacBook Pro” kompüterini idarə edə və klonlanmış səsi ilə danışa bilir. Onun beyninə yerləşdirilən cihaz 1024 elektrodla neyron fəaliyyətini qeydə alır və bu siqnalları simsiz şəkildə kompüterə ötürür. Süni intellekt alqoritmləri isə siqnalları təhlil edərək istifadəçinin nə etmək istədiyini müəyyənləşdirir və kursorun idarəsini təmin edir.

“Neuralink” komandası ünsiyyəti daha da sürətləndirmək üçün proqnozlaşdırıcı mətn texnologiyaları və süni intellektlə işləyən söhbət proqramı da hazırlayıb. Proqram Smithin səsini təqlid edərək real vaxtda cavablar təqdim edir.mProqram söhbətləri dinləyir və Smithin klonlanmış səsindən istifadə edərək cavablar təklif edir. Smith özü yazı sürətini artırmaq məqsədi ilə bir barmaq və ya siçan ilə istifadə edilə bilən yeni klaviatura dizaynı üzərində işlədiyini deyir.

5 milyard dollar dəyərində qiymətləndirilən və əvvəllər ABŞ Qida və Dərman İdarəsindən (FDA) təsdiq almaqda çətinlik çəkən “Neuralink”, indi klinik sınaqlarını uğurla davam etdirir. Şirkət gələcəkdə bu texnologiyanı daha geniş auditoriyaya təqdim etməyi planlaşdırır.

Bu hadisə, ağır nevroloji xəstəliklərdən əziyyət çəkən insanların həyat keyfiyyətini yüksəltmək üçün beyin-kompüter interfeyslərinin real potensialını bir daha göstərmiş oldu.

Fidan Hacızadə
Sfera.az

Beyinə yerləşdirilən cihazla idarəetmə mümkün olacaq