Sakit okeanda 15 metrlik sirli monolit tapılıb - FOTO
ABŞ Milli Okean və Atmosfer İdarəsinin (NOAA) tədqiqatçıları Sakit okeanının dibində, Havay adalarının şimal-qərbində yerləşən "Papahanaumokuakea" dəniz qoruğu yaxınlığında sirli bir daş monolit aşkar ediblər.
Sfera.az xarici mediaya istinadən xəbər verir ki, NOAA-nın 28 günlük dəniz ekspedisiyası zamanı 15 metr hündürlüyündə və 4 metr enində olan bu sütun, dəniz səviyyəsindən 2 040 metr dərinlikdə, Honolulu şəhərindən 1160 dəniz mili şimal-qərbdə yerləşən sualtı bir silsilədə kəşf olunub.
Kəşf anı canlı yayımda izlənilib və tədqiqatçılar arasında təəccüb doğurub. Bəzi alimlər “Bu nəhəng bir qaya, divardır, nədir bu?” kimi suallar verərkən, digərləri onu “baca”ya bənzədiblər.
Araşdırmalar nəticəsində məlum olub ki, bu quruluş əslində vulkanik damar, lavanın digər süxurlar arasına nüfuz etməsi ilə yaranmış bir geoloji strukturdur. Alimlər bildiriblər ki, bu tip damarlara nadir hallarda bu qədər açıq və təmiz formada rast gəlinir.
Merilend Universitetindən geoloq Val Finlayson qeyd edib ki, bu strukturun qeyri-adi cəhəti onun düz səthdən dik şəkildə qalxmasıdır. Onun fikrincə, bu monolit yaxınlıqdakı bir sualtı vulkanın boru sisteminin qalıqları ola bilər.
Daşın səthindəki parıltı isə güclü və davamlı dəniz axınlarının onun üzərini cilalaması ilə izah olunur. Monolitin yaşı hələ müəyyən edilməyib.
Bu qeyri-adi tapıntı elm adamları tərəfindən böyük maraqla qarşılanıb və dəniz geologiyasına dair yeni məlumatların əldə olunacağına ümid verib.
Bəsti Rəfizadə
