1912-ci ildə baş verən "Titanik" faciəsindən sağ çıxan azsaylı şəxslərdən biri polkovnik Arçibald Qracie tərəfindən yazılmış kəhanət məktubu ilk dəfə açıq hərraca çıxarılıb. Mütəxəssislər məktubun 60 min funt sterlinqə (təxminən 132 min manat) satılacağını proqnozlaşdırıb.

Sfera.az xarici mediaya istinadən xəbər verir ki, məktub, İngiltərənin Viltşire bölgəsində yerləşən “Henry Aldridge and Son” müzeyində 26 aprel tarixində satışa təqdim ediləcək.

Polkovnik Qracie bu məktubu "Titanik"lə səfər zamanı yazıb. Məktubda yer alan “Gözəl bir gəmi, amma onun haqqında hökm verməzdən əvvəl səfərimin sonunu gözləyəcəyəm” cümləsi, faciədən yalnız beş gün əvvəl yazıldığı üçün “sehirlə dolu” hesab edilir.

Polkovnik, çevrilmiş xilasedici qayığa minərək "Titanik"dən xilas olmuşdu. Lakin o, hadisədən sonra sağlamlığını bərpa edə bilmədi və faciədən səkkiz ay sonra dünyasını dəyişdi. Qracie həmçinin “Titanik haqqında həqiqət” adlı kitab yazaraq, yaşadıqlarını oxucularla bölüşmüşdü.

Hərrac evinin rəhbəri Andrev Aldridqe, bu məktubun "Titanik"lə bağlı mövcud olan ən nadir yazılı sənədlərdən biri olduğunu bildirib. “Bu, sadəcə polkovnik Qracie tərəfindən yazılması ilə deyil, həm də içindəki önəmli mesajla diqqət çəkir”, – deyə Aldridqe qeyd edib.

Məktubun 10 aprel 1912-ci il tarixini daşıdığı, 11 apreldə İrlandiyanın Quinstoun şəhərinə, 12 apreldə isə Londona göndərildiyi bildirilib.

Araşdırmalara görə, bu sənəd polkovnik Qracienin "Titanik"də yazılan və günümüzə qədər gəlib çatan yeganə məktubdur.

Bəsti Rəfizadə

"Titanik"də yazılan yeganə məktub hərraca çıxarılıb - FOTO