Tənbəllik insanda bu qabiliyyəti gücləndirir - Maraqlı araşdırma

İnsan beynindəki yaradıcı düşüncə və tənbəllik arasındakı maraqlı əlaqə ortaya çıxıb. 

Sfera.az “Psychology Today” jurnalında dərc olunan araşdırmaya əsasən xəbər verir ki, bəzən tənbəllik kimi qəbul etdiyimiz davranış formaları əslində beynin enerjini qoruma mexanizmi olaraq işləyir və bu, yaradıcılığın yaranmasına şərait yaradır.

Araşdırmaya əsasən, beyin enerjiyə qənaət etmək üçün avtomatik olaraq daha az səylə daha səmərəli yollar axtarır. Bu zaman isə yeni ideyaların, fərqli yanaşmaların və innovativ həllərin ortaya çıxması mümkündür. Bu vəziyyətə alimlər “yaradıcı tənbəllik” adını veriblər.

Nevroloq Markus Bell bu haqda belə deyib: “İnsan beyni tənbəllik anlarında daha sərbəst düşünür, çünki xarici təzyiqlər və məqsədyönlü diqqət azalır. Bu isə daha çox assosiativ düşüncəyə, yəni yeni və əlaqəsiz ideyalar arasında bağlantı qurmağa səbəb olur”:

Bu təhlil, xüsusilə uzun müddət diqqət və enerji tələb edən işlərdə çalışan insanlar üçün yaradıcı fasilələrin vacibliyini bir daha vurğulayır. Mütəxəssislər tövsiyə edirlər ki, insanlar bəzən “heç nə etməmə” anlarını günahkar kimi yox, yaradıcı potensialın mənbəyi kimi görsünlər.

Fidan Hacızadə