Sosial media nəhəngi "Meta", gözlənilməz bir qərarla "Facebook", "Instagram", "WhatsApp" və "Threads" kimi məşhur tətbiqlərindən "Apple"ın süni intellekt əsaslı yazı funksiyalarını aradan qaldırıb.

Sfera.az xəbər verir ki, hazırda nə "Meta", nə də "Apple" bu məsələ ilə bağlı rəsmi açıqlama verməyib.

Ancaq iki texnologiya nəhəngi arasında mümkün fikir ayrılığı və ya texniki səbəblərlə bağlı olaraq süni intellekt əsaslı yazı funksiyaları ləğv edilib.

Dəyişiklikdən sonra "Instagram"da mətn redaktəsi zamanı əvvəlki kimi "Apple Intelligence" alətləri görünmür. Onun əvəzinə istifadəçilərə "Meta"nın öz süni intellekt sistemi olan “Meta AI” ilə yazmaq imkanı verən “AI ilə Yaz” seçimi təklif olunur. Eyni hal "Threads" və "WhatsApp"da da müşahidə olunur. Bu tətbiqlərdə artıq "Apple"ın yazı alətlərinə rast gəlinmir.

Maraqlıdır ki, "Signal", "Bluesky" və "X" (əvvəlki Twitter) kimi digər platformalarda "Apple Intelligence" funksiyaları hələ də aktivdir.

"Apple Intelligence" yazı alətləri "iPhone 15 Pro", "iPhone 16" modelləri, 2024-cü il "iPad Mini" və bəzi "Mac" cihazlarında istifadə oluna bilir. Bu alətlər vasitəsilə istifadəçilər mətnlərindəki qrammatik səhvləri düzəldə, həmçinin yazılarını “Dostyana”, “Qısa” və ya “Peşəkar” üslublarda yenidən tərtib edə bilirdilər.
Hazırda "Apple" və "Meta" arasında bu funksiyaların deaktiv edilməsinə səbəb olan detallarla bağlı ictimaiyyətə məlum rəsmi bir səbəb yoxdur.

Bəsti Rəfizadə

"Meta"dan "Apple"yə qadağa - Bu funksiya ləğv olundu