Yaponiyada vəhşi heyvan öldürməyə icazə verilib
Yaponiyada ayı və vəhşi donuz kimi heyvanların yaşayış məntəqələrinə daxil olması halında onların vurulmasına imkan verən yeni qanun qüvvəyə minib. Qanun layihəsi parlamentdə qəbul edilərək rəsmiləşib.
Sfera.az xarici mediaya istinadən xəbər verir ki, yeni qanuna əsasən, bələdiyyələr təcili hallarda ovçulara atəş açmaq icazəsi verə biləcək.
Boz ayı, Asiya qara ayısı və vəhşi donuzlar təhlükəli heyvanlar kimi təsnif olunub. Qanunda “təcili hal” anlayışı da dəqiqləşdirilib: heyvanın silahsız yaxalanmasının mümkün olmaması və güllələrin insanlara dəymə riskinin olmaması əsas meyarlar kimi göstərilib.
Eyni zamanda, bələdiyyə orqanlarına insanların təhlükəsizliyini təmin etmək üçün nəqliyyatı məhdudlaşdırmaq və ya təxliyə əmri vermək səlahiyyəti verilir. Silahdan istifadə zamanı binalara dəyən ziyana görə yerli idarələr təzminat ödəməli olacaqlar.
Yaponiyanın vəhşi təbiət üzrə səlahiyyətli qurumlarının məlumatına görə, 2023-cü ilin martından sonra baş verən ayı hücumlarında 6 nəfər həyatını itirib, təxminən 200 nəfər isə xəsarət alıb. Qanunun vəhşi heyvanların insanlara və yaşayış sahələrinə təhlükə yaratmasının qarşısını almaq məqsədi daşıdığı bildirilir.
Bəsti Rəfizadə
