Avropa İttifaqı ABŞ Prezidenti Donald Trampın elmi siyasətləri nəticəsində ölkəni tərk etmək məcburiyyətində qalan alimləri qəbul etməyə hazır olduqlarını bildirib. Avropa İttifaqı bu beyin axınını elmi inkişaf üçün tarixi bir fürsət kimi dəyərləndirir.

Sfera.az xəbər verir ki, elmi jurnal "Nature" tərəfindən aparılan sorğuya əsasən, ABŞ-də hər dörd tədqiqatçıdan üçü ölkəni tərk etməyi düşünür. Sorğuda iştirak edənlərin əksəriyyəti Kanada, Avropa və Avstraliyaya köç etməyə maraqlı olduqlarını bildiriblər.

Bu prosesə reaksiya olaraq, Avropa ölkələri ABŞ-dən ayrılan tədqiqatçılar üçün xüsusi proqramlar hazırlamağa başlayıb. Almaniyanın nüfuzlu “Der Spiegel” nəşrində səkkiz alman alim “Almaniya üçün 100 parlaq beyin” çağırışı ilə çıxış edib. Onlar, nasist dövründə ölkədən qaçan Eynşteyn və Meytner kimi alimləri xatırladaraq, Almaniyanın bu dəfə ABŞ-dən beyin axınını qəbul edə biləcəyini bildiriblər.

Avropa Komissiyasının “Startap, Tədqiqat və İnnovasiya” üzrə məsul üzvü Ekaterina Zaxarieva bu qlobal mənzərənin Avropanın elm və tədqiqat üçün təhlükəsiz məkana çevrilməsi üçün bir fürsət olduğunu bildirib. O, ABŞ-dən gələn alimlər üçün xüsusi viza proqramları üzərində çalışdıqlarını və Avropa Tədqiqat Şurası vasitəsilə ayrılan maliyyə dəstəyinin artırılacağını qeyd edib.

Fransanın Marsel şəhərindəki "Aix-Marseille" Universitetində yaradılan “Elm üçün Təhlükəsiz Məkan” platformasına artıq 300-dən çox amerikalı tədqiqatçı maraq göstərib. Universitet rəhbəri Erik Berton, ilk alimlərin iyun ayında gələcəyini və onların ailələrinin də Avropaya yerləşməsini asanlaşdırmaq üçün tədbirlər gördüklərini deyib.

Belçika və Hollandiya da ABŞ-dən ayrılan alimləri cəlb etmək üçün xüsusi fondlar ayırdıqlarını açıqlayıblar. Berlin şəhər rəhbərliyi isə şəhəri ABŞ-dən köç edən alimlər üçün cəlbedici məkana çevirmək məqsədilə maliyyə dəstəyi ayırmağa hazırlaşır.

Bəsti Rəfizadə

Elm adamları ABŞ-ni tərk edir - Avropa bu fürsəti dəyərləndirmək istəyir