Yerdən kənarda həyatın izləri aşkarlanıb: "Bu, ən güclü sübut ola bilər"
Alimlər Yer kürəsindən 120 işıq ili uzaqlıqda yerləşən "K2-18b" adlı planetdə yadplanetlilərə dair ən güclü sübutu aşkar etdiklərini açıqlayıblar.
Sfera.az xəbər verir ki, Kembric Universitetinin alimləri tərəfindən aparılan araşdırmalar nəticəsində, bu planetin atmosferində Yerdə əsasən canlı orqanizmlərlə əlaqəli olan bir molekulun izinə rast gəlinib.
Tədqiqatın nəticələri nüfuzlu "Astrophysical Journal Letters" jurnalında dərc edilib.
Tədqiqatın müəllifi, professor Nikku Madhusudhan, "BBC"yə verdiyi açıqlamada qeyd edib ki, bu, indiyə qədər başqa planetdə həyat olduğuna dair ən güclü sübut ola bilər. "Bu siqnalı bir və ya iki il ərzində real şəkildə təsdiqləyə biləcəyimizi düşünürük”, – deyə o bildirib.
Araşdırmalar "K2-18b"nin dərin bir okeanla örtülü ola biləcəyini və orada canlı orqanizmlərin yaşaya biləcəyini göstərir. Alimlər, Yerdə dəniz fitoplanktonları və bakteriyalar tərəfindən istehsal olunan kimyəvi maddələrin bu planetdə minlərlə dəfə çox olduğunu müəyyən ediblər.
Tədqiqatçılar planetin hidrogenlə zəngin atmosferə və Yerdəkindən daha dərin okeanlara sahib ola biləcəyini vurğulayıblar. Araşdırmanın həmmüəlliflərindən Mans Holmberq deyib ki, bu sistemdə hər şey yad və fərqlidir. Onun sözlərinə görə, Günəş sistemimizdə buna bənzər bir şey yoxdur.
Hazırda planetdə aşkar olunan molekulların canlı orqanizmlərlə əlaqəli olub-olmadığı araşdırılır. Tədqiqatçılar bu kimyəvi izlərin daha əvvəl müşahidə olunmamış bir prosesin nəticəsi ola biləcəyini də istisna etmirlər.
“Ya tamamilə yeni bir kimyəvi proseslə qarşı-qarşıyayıq, ya da Yer kürəsindən kənarda həyatın ilk izlərinə şahidlik edirik", – deyə Holmberq bildirib.
Bəsti Rəfizadə
