"WhatsApp"da olan hər şəkli açmayın: "Məlumatları itirə bilərsiniz"
Dünyanın ən populyar mesajlaşma platforması olan "WhatsApp" istifadəçilərini təhlükəli bir boşluq barədə xəbərdar edib.
Sfera.az xəbər verir ki, bu barədə "META" şirkəti tərəfindən yayımlanan açıqlamada bildirilib.
Mütəxəssislər bu problemi “spoofing” — yəni saxta yönləndirmə olaraq adlandırır. Boşluq, məqsədli şəkildə hazırlanmış fayl və ya şəkil vasitəsilə "WhatsApp" üzərindən yayılır. İstifadəçi bu faylı açdıqda, görünən şəkil əvəzinə arxa planda zərərli kod işə düşə və bu, cihazın ələ keçirilməsi ilə nəticələnə bilər.
"META" təhlükəsizlik boşluğuna görə hər hansı bir istifadəçinin zərər görüb-görmədiyi ilə bağlı məlumat paylaşmasa da, təhlükəsizlik mütəxəssisləri istifadəçiləri dərhal proqramı yeniləməyə və xüsusilə qrup söhbətlərində paylaşılan şəkillərə qarşı ehtiyatlı olmağa çağırıb.
Kibertəhlükəsizlik üzrə məsləhətçi Adam Pilton bildirib ki, çox adam "WhatsApp" qruplarında şəkil paylaşır. Onun sözlərinə görə, əgər bir kibercinayətkar bu görüntünü etibar edilən bir istifadəçi vasitəsilə qrupa daxil edərsə, digərləri zərərli proqramı bilmədən işə sala bilər.
Təhlükəsizlik üçün "WhatsApp" istifadəçilərinə tətbiqi ən son versiyaya yeniləmək və tanımadıqları mənbələrdən gələn faylları açmamaq tövsiyə olunur.
Bəsti Rəfizadə
