Dünyanın aparıcı sərmayə yolu ilə oturum və vətəndaşlıq məsləhət şirkəti “Henley & Partners” ilə qlobal məlumat-analitika qurumu “New World Wealthin” birgə hazırladığı "Dünyanın ən zəngin şəhərləri 2024” hesabatı açıqlanıb.

Sfera.az xarici mediaya istinadən xəbər verir ki, hesabata əsasən, ABŞ siyahıda 11 şəhərlə liderliyini davam etdirir. Nyu-York şəhəri 818 sentimilyoner (100 milyon dollardan çox sərvətə sahib şəxs), 66 milyarder və ümumilikdə 384 min 500 yüksək sərvətli fərdlə birinci yer olub.

İkinci pillədə 342 min 400 milyonçunun yaşadığı San-Fransisko və Silikon Vadisini əhatə edən Bay Area gəlir. Son 10 ildə zənginlərin sayında 98 faiz artım müşahidə olunan bu region, 82 milyarder ilə texnologiya sərvətinin yeni mərkəzinə çevrilib.

2023-cü ildə siyahıya 5 şəhərlə daxil olan Çin, bu il Quançjou şəhərinin əlavə olunması ilə ümumilikdə 6 şəhərlə təmsil olunur və ABŞ-dən sonra ikinci yeri tutur.
ABŞ-də bəzi şəhərlərdə isə milyonçu sayı ikiqat artıb. Scottsdale şəhərində son 10 ildə milyonçu sayı 125 faiz, Vest Palm Biçdə isə 112 faiz artıb. Mayami (94%), Vaşinqton DC (92%) və Austin (90%) kimi şəhərlər də sürətlə yüksələnlər arasındadır.

Bir zamanlar dünyanın ən zəngin şəhərlərindən olan London, bu il 215 min 700 milyoner ilə 6-cı sıraya geriləyib. Son 10 ildə milyoner sayında 10 faizdən çox azalma müşahidə olunub. Moskva isə daha ciddi itki ilə – 25 faiz azalma nəticəsində 40-cı yerə enib. Bu iki şəhər siyahıda zənginlərin sayında mənfi artım göstərən nadir nümunələrdir.

Tokio 292 min 300 milyonçu ilə 3-cü sıradakı mövqeyini qoruyub. Sinqapur 242 min 400 milyonçu ilə 4-cü, Los Anceles isə 220 min 600 milyoner ilə Londonu geridə qoyaraq 5-ci sıraya yüksəlib.

Fidan Hacızadə

Dünyanın ən zəngin şəhərləri bəlli oldu