Hər hərəkətin mənası var - Bədən dilinin gizli AÇIQLAMASI

Bədən dili insanın heç bir söz demədən, bədəni vasitəsilə hiss və fikirlərini ifadə etmə üsulu kimi qəbul olunur.

Sfera.az “NTV”yə istinadən xəbər verir ki, psixoloq  Aleksandra Stratyner insanların düşüncələrini oxumağın bədən dili vasitəsilə mümkün ola biləcəyini bildirib. Mütəxəssisə görə, bədən dilində diqqət yetirilməli əsas məqamlardan biri duruşdur. Açıq sinə və düz geriyə çəkilmiş çiyinlər özünəinamın göstəricisidir. Əksinə, çökük duruş və ya əyilmiş çiyinlər insanın güvənsiz, müdafiə mövqeyində və ya yorğun olduğunu göstərə bilər.

Həkimin sözlərinə görə, beyində başqasını təqlid etdikdə və ya qarşı tərəf bizi təqlid etdikdə aktivləşən “ayna neyronlar” mövcuddur. Məsələn, birisi bizə gülümsəyəndə, biz də təbii şəkildə cavab olaraq gülümsəyirik. Əgər qarşı tərəf buna cavab vermirsə, bu onların bizdən narazı olduğunu göstərə bilər.

Bir şəxsin tez-tez hansı sözlərdən istifadə etməsi onun psixoloji vəziyyətini və dəyərlərini əks etdirir. “Mən” sözünü tez-tez işlədən insanlar daha çox özünü ön plana çıxaran xarakterə sahib ola bilər. “Biz” ifadəsindən istifadə edənlər isə daha kollektiv düşüncəli və komanda ruhuna sahib olur.

Bəzi mütəxəssislər bildirir ki, daim həyəcanlı olan şəxslər çiyinlərini yuxarıda tutmağa meyilli olur. Bu isə bəzən stress və ya həddindən artıq sosial davranışın əlaməti ola bilər. 

Stratyner həmçinin qeyd edib ki, bədən dili tam elmi əsaslara söykənmir və onunla bağlı nəticələr hər zaman dəqiq olmaya bilər. Yorğunluq, diqqətsizlik və mədəni fərqliliklər bədən dili və mimikaların mənasını dəyişdirə bilər. Jestlər də müxtəlif mədəniyyətlərdə fərqli məna daşıya bilər.
 

Fidan Hacızadə