Antarktidada yeni dəniz canlıları aşkarlanıb - Adlar

Avstraliyalı alimlər Antarktida qitəsinin şərqində apardıqları tədqiqatlar zamanı elm dünyasına məlum olmayan yeni dəniz canlıları növlərinə rast gəliblər.

Sfera.az xarici mediaya istinadən xəbər verir ki, Avstraliya Antarktika Proqramının təşkilatçılığı və dörd elmi qurumun birgə əməkdaşlığı ilə həyata keçirilən 60 günlük ekspedisiya zamanı "RSV Nuyina" adlı buzqıran gəmi vasitəsilə bölgədə geniş tədqiqat aparılıb.

Tədqiqatçılar daha isti suların Denman Buzlağına təsirini araşdırmaqla yanaşı, okeanın cənub hissəsindən götürdükləri nümunələr əsasında bölgədəki bioloji müxtəlifliyi də təhlil ediblər. Alimlər dəniz donuzu, izopodlar, dəniz kəpənəkləri kimi tanınmış növlərlə yanaşı, əlin böyüklüyündə dəniz hörümçəkləri, yemək boşqabı böyüklüyündə dəniz ulduzları və bölgəyə xas osminoq növləri kimi daha əvvəl elmə məlum olmayan canlılara da rast gəliblər.

Tədqiqat zamanı dəniz kəpənəklərindən birinin gəmidəki akvariumda yumurtlaması nəticəsində alimlər bu canlıların – pteropodların – yumurta inkişafını ilk dəfə müşahidə etmək imkanını əldə ediblər.

Tədqiqatçılardan Laura Herraiz Borreguero bildirib ki, ekspedisiya zamanı 4 min kilometr məsafə qət edilib və Denman Buzlağından alınan nümunələr əsasında müxtəlif dərinliklərdə suyun temperaturu, duzluluq səviyyəsi və oksigen miqdarı da analiz olunub. Onun sözlərinə görə, son 20 ildə buzlaq 5 kilometr geri çəkilib.
Alim vurğulayıb ki, sistemin dəyişməsi müşahidə olunur və bu dəyişikliklərin izlənməsi gələcək iqlim modellərinin qurulması, eləcə də müvafiq uyğunlaşma və qarşısınıalma strategiyalarının hazırlanması baxımından böyük əhəmiyyət daşıyır.

Ekspedisiya qrupu fevral ayında yola düşüb və mayın əvvəlində Avstraliyanın Hobart şəhərinə qayıtması planlaşdırılır.

Bəsti Rəfizadə