“WhatsApp” bəzi köhnə telefonlarda işləməyəcək – Tarix açıqlandı
Dünyanın ən çox istifadə olunan mesajlaşma tətbiqlərindən biri olan “WhatsApp” 1 may 2025-ci il tarixindən etibarən bəzi köhnə model telefonlarda işləməyəcək.
Sfera.az xəbər verir ki, “Meta” şirkətinin yaydığı məlumata görə, bu qərarın əsas səbəbləri arasında təhlükəsizlik riskləri, performans problemləri və istifadəçi təcrübəsini zəiflədən texniki çatışmazlıqlarla bağlıdır.
Şirkət bildirib ki, tətbiqin ən son versiyasını dəstəkləməyən cihazlar “WhatsApp”dan istifadə edə bilməyəcək.
Yeni dəyişikliklərə əsasən, “WhatsApp” yalnız iOS 15.1 və daha yeni versiyaları dəstəkləyəcək. Bu da o deməkdir ki, iOS-un köhnə versiyalarını istifadə edən cihazlar artıq tətbiqə daxil ola bilməyəcək.
Bu qərar xüsusilə köhnə “iPhone” modellərinə sahib milyonlarla istifadəçini əhatə edir. Əgər cihaz iOS-un yeni versiyasını qəbul etmirsə və ya yenilənməyibsə, “WhatsApp”dan istifadənin mümkün olmayacağı qeyd olunub.
“WhatsApp”ın dəstəyini itirəcək bəzi cihazlar:
"Apple":
• "iPhone" 5
• "iPhone" 5C
• "iPhone" 6 seriyası
"Samsung":
• "Galaxy Ace Plus"
• "Galaxy Note 3 seriyası"
İstifadəçilərə tövsiyə olunur ki, cihazlarını yeniləmə imkanları yoxdursa, alternativ ünsiyyət vasitələrindən istifadə etsinlər.
Fidan Hacızadə
